މީޑިޔާ ކައުންސިލްގެ ރައީސްކަމުގެ މަގާމުގައި މީގެ ކުރިން ހުންނެވި ޝަހުބާން ފަހުމީ އިސްތިއުފާ ދިނުމުން އެމަގާމަށް ޝަފާއު އިންތިހާބުކޮށްފައިވަނީ އިއްޔެ އެވެ.
"ސީއެންއެމް"އަށް ޝަފާއު މިއަދު ވިދާޅުވީ ކުރިއަށް އޮތީ މީޑިޔާ ކައުންސިލްގެ އިންތިހާބު ކަމަށެވެ. އަދި ވިދާޅުވީ ކައުންސިލްގެ ގާނޫނުގައި ބައެއްކަންކަން އިސްލާހުކުރަން މިވަގުތުވެސް ޖެހޭ ކަމަށެވެ.
ޝަފާއު ވިދާޅުވީ މީޑިޔާ ކައުންސިލްގެ ގާނޫނުގައި ކައުންސިލަށް އިންތިހާބު ކުރާ ފަރާތެއް ދެވަނަ ދައުރަކަށް އެ މަގާމަށް ކުރިމަތި ނުލެވުމަށް އޮންނަ މާއްދާއަށް އިސްލާހު ގެންނަން ޖެހޭ ކަމަށެވެ. އަދި މިކަމާ ކައުންސިލްގެ ބައްދަލުވުމުގައި މެންބަރުންނާއި މަޝްވަރާކުރައްވާނެ ކަމަށެވެ.
މީޑިޔާ ކައުންސިލްގެ މިހާރުގެ ދައުރު ނިމޭނީ އަންނަ ޑިސެމްބަރު މަހުގެ 15 ވަނަ ދުވަހަށެވެ. ކައުންސިލްގައި ތިއްވަނީ ޖުމްލަ 15 މެންބަރުންނެވެ.
މީޑިޔާ ކައުންސިލްގެ ގާނޫނުގައިވާގޮތުން ކައުންސިލްގެ މިދައުރު ހަަވުމުން އަލަށް މެންބަރުން އިންތިހާބުކުރާއިރު އިންތިހާބު ކުރަނީ 13 މެންބަރަކަށެވެ. ބާކީ ތިބި ދެ މެންބަރުންނަކީ މިދައުރުގެ މެދުތެރެއިން އިންތިހާބު ކޮށްފައިވާ ދެ މެންބަރުންނަށް ވުމުން ކައުންސިލްގެ ގާނޫނުގައި ބުނާގޮތުން ދެ އަހަރުގެ ދައުރު ހަމަނުވުމުން މި މަގާމުގައި ތިބި މެންބަރުންގެ ބަދަލުގަިއ އިތުރު މެންބަރުން އިންތިހާބުކުރާކަށް ނުޖެހެއެވެ.
