ޕްރޮސިކިއުޓާ ޖެނެރަލް (ޕީޖީ) ހުސައިން ޝަމީމް މަގާމުން ވަކިކުރުމަށް އެމްޑީޕީގެ ޕާލަމެންޓްރީ ގުރޫޕުން އިއްޔެ ނިންމާފައިވާއިރު އެކަމާ ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވަނީ ދެކޮޅު ހައްދަވާފައެވެ. އަދި ރައީސް ނަޝީދު ހިމެނޭ ގޮތަށް 19 މެންބަރަކުވެސް ވަނީ ވިޕްލައިނަށް ތާއީދު ނުކުރައްވާނެކަން މީޑިޔާތަކުގައި ވަނީ އަޑުފެތުރިފަ އެވެ.
"ސީއެންއެމް"އަށް މިއަދު ދެއްވި އިންޓަވިއުގައި އަސްލަމް ވިދާޅުވީ ބައެއ ފަރާތްތަކުން ބޮޑު މަގާމެއް ލިބުމުން ގާނޫނާއި ގަވައިދުގެ މަތިންވެސް ހަނދާން ނެތިގެންދާކަމަށެވެ. އަދި ވިދާޅުވީ ކިތަންމެ ބޮޑު މަގާމެއް ލިބިފައިހުރިނަމަވެސް ނިންމުންތަކާއި، ހިލާފުވުމުން ފިޔަޅު އެޅުމުގައި ފަސްޖެހިވަޑައިނުގަންނަވާނެ ކަމަށެވެ.
އަސްލަމް ވިދާޅުވީ ބައެއް މެންބަރުން އެޕާޓީގެ ޕާލަމެންޓްރީ ގުރޫޕުގެ ނިންމުންތަކަށް ތާއީދު ނުކުރާ ކަމަށް މީޑިޔާ ތަކުގައި ފެންނަމުންދާ ކަމަށެވެ. އަދި ވިދާޅުވީ ނިންމުންތަކަށް އިހުތިރާމް ނުކުރާނަމަ ފިޔަވަޅު އެޅުމުގައި އެއްވެސް މީހެއްގެ މޫނަކަށް ކަނދުރާއަކަށް ނުބައްލަވާނެ ކަމަށެވެ.
އެމްޑީޕީގެ ޕާލިމެންޓްރީ ގުރޫޕުގައި 65 މެންބަރުން ތިއްބެވިއިރު 19 މެންބަރަކު ވިޕްލައިނާ ހިލާފުވެފައިވާކަމަށް އަޑުފެތުރިފައިވާ ކަމަށް އިޝާރާތްކުރައްވައި އަސްލަމް ވިދާޅުވީ ބައެއް މެންބަރުން އެގޮތަށް ވިދާޅުވިނަމަސް އެމަނިކުފާނަށް ގުޅުމަށްފަހު ޕާޓީގެ ވިޕްލައިނާ ހިލާފު ނުވާނެކަމަށްވެސް ބުނެފަިއވާ ކަމަށެވެ. ނަމަވެސް އެއީ ކޮންކޮން މެންބަރުންނެއް ކަމެއް އަސްލަމް ހާމައެއް ނުކުރައްވަ އެވެ.
ވިޕްލައިނާ ބެހޭގޮތުން ކަންކަން ނިންމުމުގެ ކުރިން ބަހުސް ކުރަން ޖާގަ ނުދީ ނެރޭ ވިޕްލައިނަކަށް ތަބާ ނުވާނެ ކަމަށާއި "ހަދާނެ އެއްޗެއް ހަދަންވީ" ކަމަށް ރައްޔިތުން މަޖިލީހުގެ ނައިބު ރައީސް އީވާ ޢަބްދުﷲ ވަނީ މިއަދު ވިދާޅުވެފައެވެ