ކުރީގެ ޗީފް ޖުޑީޝަލް އެޑްމިނިސްޓްރޭޓަރ ޑރ. ޢަބްދުﷲ ނަޒީރުގެ ދައުރުގައި މަގާމުން ވަކިކުރި ކޯޓުތަކުގެ އިދާރީ އެންމެ އިސްވެރިންގެ މައްސަލައިގެ ހުކުމް މިއަދު މެންދުރު ކުރުމަށް ހައިކޯޓުގައިވަނީ ތާވަލުކޮށްފައެވެ. މި މައްސަލައިގެ އަޑު އެހުންތައް މީގެ ދުވަސްކޮޅެއް ކުރިން ހައިކޯޓުގައިވަނީ ނިންމާލާފައެވެ.
ކޯޓު އެޑްމިނިސްޓްރޭޓަރުން ގާނޫނާ ހިލާފަށް މަގާމުން ވަކިކުރި މައްސަލައި ހައިކޯޓުގައި އިސްތިއުނާފު ކުރީ ޖުޑީޝަލް ސަރވިސް ކޮމިޝަނުންނެވެ. މި މައްސަލައިގައި ވަޒީފާއާބެހޭ ޓްރައިބިއުނަލުން ނިންމާފައިވަނީ މަގާމުން ވަކިކުރި އެޑްމިނިސްޓްރޭޓަރުން މަގާމުން ވަކިކޮށްފައިވަނީ ގާނޫނާ ހިލާފަށް ކަމަށެވެ.
ޖޭއެސްސީ ގާނޫނަށް ގެނެވުނު އިސްލާހަށް ފަހު ކޯޓުތަކުގެ ޗީފް އެޑްމިނިސްޓްރޭޓަރުން އައްޔަން ކުރުމުގެ އުސޫލު ބަދަލުކޮށް، ކުރިން ތިބި އެޑްމިނިސްޓްރޭޓަރުންގެ ތެރެއިން ވަކި މިންވަރަކަށް މާކްސް ނުލިބޭ މީހުން މަގާމުން ވަކިކުރުމުން އެ މަގާމުތަކަށް މީހުން ނުނެގުމަށް ޓްރައިބިއުނަލުން ޖޭއެސްސީގެ މައްޗަށް ކުރި އަމުރުވެސް ޖޭއެސްސީން ހައިކޯޓުގައި ކުރިން އިސްތިއުނާފު ކުރިއެވެ.
ހައިކޯޓުގައި މި މައްސަލަތައް ބަލާ ފަނޑިޔާރުންގެ ބެންޗުވަނީ ބަދަލުވެފައެވެ. ހައިކޯޓުގައި މިހާރު މި މައްސަލަތައް ބަލާ ފަނޑިޔާރުންނަކީ ހުސައިން މަޒީދުއާ، ހުސައިން ޝަހީދު އަދި ޝުއައިބު ހުސައިން ޒަކަރިއްޔާއެވެ.