މޭޔަރު މިފަދައިން ވިދާޅުވެފައި މިވަނީ އިއްޔެ މާލެ ސިޓީ ކައުންސިލުން ބޭއްވި ކައުންސިލްގެ ބައްދަލުވުމުގައި ދެއްކެވި ވާހަކަފުޅުގެ ތެރޭގަ އެވެ.
މޭޔަރު ވިދާޅުވީ ބޯހިޔާވަހިކަމުގެ މައްސަލައަށް ހައްލެއް ހޯދުމުގެ މަސައްކަތަކީ ހަތަރު ވަނަ ދައުރުގެ ކައުންސިލްގެ ފުރަތަމަ ދުވަހުން ފެށިގެން މާލޭގެ ރައްޔިތުންގެ ހައްގުގައި ކުރައްވަމުން ގެންދަވާ މަސައްކަތެއް ކަމަށާއި، އެގޮތުން ގުޅީފަޅުގެ ޕްލޭން ބަދަލުކޮށްދެއްވުމަށް ފުރަތަމަ ދުވަހުވެސް ވާނީ ރައީސުލް ޖުމްހޫރިއްޔާގެ އަރިހުގައި ދަންނަވާފައި ކަމަށެވެ.
ކައުންސިލްގެ ފުރިހަމަ އެއްބާރުލުމާއިއެކީގައި މިކަން ކުރިއަށް ގެންދިއުމަށް ފުރަތަމަދުވަހުން ފެށިގެން މިއަދާއި ހަމަޔަށްވެސް އެކިގޮތްގޮތުން މަސައްކަތް ކުރައްވަމުން ގެންދަވާކަން މޭޔަރު ފާހަގަކުރެއްވި އެވެ. މީގެ އިތުރުން ހުޅުމާލެއިން ގޯތި ދޫކުރާނަމަ ކައުންސިލްގެ އިހްތިސާސް ހިމެނޭ ސަރަހައްދެއްކަމުން ކައުންސިލް އެކަމުގައި ބައިވެރިކުރަން ދަންނަވާފައިވާނެ ކަމަށްވެސް މޭޔަރު ވިދާޅުވި އެވެ.
މީގެ އިތުރުން މޭޔަރު ވިދާޅުވީ، އަތޮޅު ތެރެއެކޭ އެއްގޮތަށް މާލޭގެ ރައްޔިތުންނަށް ގޯތި ދޭންވާނީ ހިލޭކަމުގައި ދެންނެވިފައިވާކަމަށާއި، މިހާރު ސަރުކާރުގެ ވިސްނުން އެގޮތަށް ބަދަލުވެފައިވާކަމީ މި ކައުންސިލުން މާލޭގެ ރައްޔިތުންގެ ހައްގުގައި ކުރެވުނު މުހިންމު މަސައްކަތެއް ކަމަށެވެ.
ކައުންސިލްގެ 58 ވަނަ ޖަލްސާގައި މާލޭގެ އެކި ދާއިރާތަކުގެ ކައުންސިލަރުންގެ އަރިހުން މޭޔަރު އެދިވަޑައިންނެވީ އެކި ދާއިރާތަކުގެ ރައްޔިތުންގެ ގާތަށް ޒިޔާރަތްކުރައްވާ ނިކަމެތިން ދެނެގަނެ ބޯހިޔާވަހިކަމަށް ސަރުކާރުން މިހާރު ހުޅުވާލާފައިވާ ފުރުސަތުގެ ބޭނުން ހިފުމަށް އެފަރާތްތަކަށް ހިތްވަރުދެއްވުމަށެވެ.
