ރަސޫލާ ހަދީޘް ކުރައްވާފަވެ އެވެ. "ހެޔޮ އަމަލު ގިނަ ކުރުމަށް ހައްޖުމަހުގެ ދިހަ ދުވަހަށް ވުރެ ﷲގެ ހަސްރަތުގައި ލޮބުވެތިކަން ބޮޑު ދުވަސްތަކެއް ނުވެއެވެ"
ދުވަސްތަކުގެ ތެރޭގައި ހިމެނޭ އެންމެ މާތް ދުވަހަކީ ހައްޖު ދުވަސް ނުވަތަ އަރަފާތް ދުވަހެވެ. އެދުވަހު އަރަފާތު ބިމަށް ޖަމާވެފައިތިބޭ ހައްޖުވެރިންގެ ފާފަތައް މާތްﷲ ފުއްސަވާ ދެއްވަ އެވެ. އެއީ ފާފަފުއްސެވުމާއި، ނަރަކައިން ދިންނަވައި މުއްތިކުރުމުގެ ދުވަހެވެ.
ނަމަވެސް އެދުވަހު އަރަފާތު ބިމަށް ދިއުމުގެ ނަސީބު ނުލިބޭ، މާތް ﷲ ގެ އޯގާވަންތަކަމާއި، ތަނަވަސް ރަހުމަތުން ހައްޖުގެ އަޅުކަން އަދާކުރުމުގެ ނަސީބު ނުލިބޭ މީހުން ވެސް އަރަފާތު ދުވަހުގެ ސަވާބުން މާތްﷲ މަހްރޫމް ނުކުރައްވަ އެވެ.
އަރަފާތް ދުވަހުގެ މާތްކަމުގެ މައްޗަށް އަލިއަޅުވާލާ މިއަދު ދިން ހުކުރު ހުތުބާގައި ވާގޮތުން، ހައްޖަށް ދިއުމުގެ ނަސީބު ނުލިބޭ މީހުން އަރަފާތް ދުވަހު ރޯދަހިފުން މޮޅު އިތުރުވެގެން ވެއެވެ. އަދި މާތް ﷲ ހަނދުމަކޮށް، ދުއާ ކުރުމުގައި ގިނަ ވަގުތު ހޭދަކުރަން މޮޅު އިތުރުވެގެންވެ އެވެ.
ހިތުބާގައި ބުނީ، އަރަފާތް ދުވަހަކީ ހައްޖުގެ އަޅުކަމުގައި ހިމެނޭ އެންމެ މުހިންމު ރުކުން އަދާކުރާ ދުވަސް ކަމަށާއި، އެންމެހައި ހައްޖުވެރިން އަރަފާތު ބިމުގައި ތިބެ މާތްﷲ ގެ ރަހުމަތާއި، މަގްފިރަތު އަދި ދިންނެވުމަށް އެދި މިއަދު ދުއާ ކުރާނެ ކަމަށެެވެ.
މިއަދު މާތްﷲ ދުނިޔޭގެ އުޑަށް ތަޖައްލީވެވޮޑިގެން، އުޑުގެ އަހުލުވެރިންގެ ގާތުގައި ބިމުގެ އަހުލުވެރިންނާމެދު ފަހުރުވެރިވެ ވޮޑިގެންނަވާނެ ކަމަށް ހުތުބާގައި ބުނެފައި ވެއެވެ.
އަރަފާތް ދުވަހު ފާފަފުއްސެވުމަށް އެދި ގިނަގިނައިން ދުއާކުރުމަށް ވަނީ އަންގަވާފަ އެވެ. މާތް ﷲ ހަދުމަކޮށް ފާފަ ފުއްސެވުން އެދި ދުއާކުރުމަކީ އަޅުކަމެކެވެ. އިންސާނާ ގާފިިލުކަމުން ދުރުކޮށް މާތްﷲ އާއި ގުޅުވާދެނީ ހާލިގު ހިތަކުން އަޅުތަކުން ކުރާ ދުއާއިން ނެވެ.
އަރަފާތް ދުވަހަކީ ދުއާ އިޖާބަކުރެއްވުމުގެ ދުވަހެވެ. އެހެންކަމުން މިއަދު ގިނަގިނައިން ދުއާކުރުމަށް ހުތުބާގައި ވަނީ އިލްތިމާސްކޮށްފަ އެވެ.
މާތްﷲ ވަހީކުރައްވާފަވެއެވެ. މާނައީ؛ ތިބައިމީހުން ތިމަންރަސްކަލާނގެއަށް ދުއާ ކުރާށެވެ. ތިމަންރަސްކަލާނގެ ތިޔަބާމީހުން ދުއާ އިޖާބަކުރައްވާ ހުށީމެވެ. ހަމަކަށަވަރުން ތިމަންރަސްކަލާނގެއަށް ދުއާކޮށް، އަޅުކަން ކުރުމަށް ކިބުރުވެރިވެ ގަންނަ މީހާ ދަންނާށެވެ. ނިކަން ހުރެ ނިކަމެތިވެގެންވާ ހާލު އެއުރެން ނަރަކައަށް ވަންނާނެތެވެ.
