ރޭ ތާޖުއްދީން ސުކޫލްގައި އެ ކުންފުނީގެ ބޯޑު މެމްބަރުންނާއި، މުވައްޒަފުންނާއި ބައްދަލު ކުރައްވާ ޝަރީފް ދެއްކެވި ވާހަކަފުޅުގައި ވިދާޅުވީ، އެ ކުންފުނީގެ މުވައްޒަފުންނަކީ ގައުމީ ހިދުމަތެއް ކޮށްދެއްވަމުން އަންނަ ބައެއް ކަމަށާއި، އެ މުވައްޒަފުންނަށް ހިތްހަމަ ޖެހޭ މާހައުލެއް ގާއިމް ކޮށްދިނުމަކީ އެ ކުންފުނީގެ އަމާޒު ކަމަށެވެ.
އެގޮތުގެ މަތިން އެ ކުންފުނީގެ މުވައްޒަފުންނަށް އިތުރު ބޯހިޔާވަހިކަމުގެ މަޝްރޫއުއެއް ފެށުމަށް ނިންމާފައި ވާކަމަށާއި، މި މަޝްރޫއު ފެށުމަށް ހަމަޖެހިފައިވަނީ ވިލިމާލޭގައި ކަމަށް ޝަރީފް ވިދާޅުވި އެވެ.
ޝަރީފްގެ ވާހަކަފުޅުގައި އިތުރަށް ވިދާޅުވީ، ހިޔާ މަޝްރޫއުގެ ތެރޭގައި ހިމެނޭ ސްޓެލްކޯ މުވައްޒަފުންގެ ފްލެޓުތައް އަންނަ އޯގަސްޓު މަހު ހަވާލެކުރެވޭނެ ކަމަށެވެ.
ޝަރީފް ވިދާޅުވީ އެއްކޮޓަރީގެ އެޕާޓްމަންޓްތަކުން މަހުކުލީގެ ގޮތުގައި ނަގާނީ 5622 ރުފިޔާ ކަމަށާއި 1+2 އެޕާޓްމަންޓްތަކުން ނަގާނީ 10356، 10652 ދެމެދުގެ އަދަދެއް ކަމަށެވެ. އަދި އެއް އަހަރު ދުވަސް ވަންދެން ފެނާއި ނަރުދަމާއަށް ޖެހޭ މައްސަލަ ހައްލުކޮށްދޭނެ ކަމަށް ވެސް ޝަރީފު ވިދާޅުވި އެވެ.
ހުޅުމާލޭގެ ދެ ވަނަ ފިޔަވަހީގެ ދެ ޓަވަރެއްގައި، ސްޓެލްކޯގެ މުވައްޒަފުންނަށް 360 ފްލެޓް ވަނީ އިމާރާތް ކޮށްފައެވެ.