ޖުޑީޝަލް އަހަރު ފެށުމަށް ދަރުބާރުގޭގައި މިރޭ ބޭއްވި ރަސްމިއްޔާތުގައި ވާހަކަފުޅު ދައްކަވަމުން ރައީސް ސޯލިހު ވިދާޅުވީ ރައްޔިތުންގެ ހައްގުތައް ރައްކާތެރި ކުރުމުގައި އެންމެ މުހިއްމު ދައުރެއް އަދާ ކުރާ ފަނޑިޔާރުން ކަމަށާއި، ފަނޑިޔާރުންނަށް ނުފޫޒު ފޯރުވައިގެން ނުވާނެ ކަމަށް ގާނޫނު އަސާސީގައި ލިޔެފައި ވަނީ އެހެންވެ ކަމަށެވެ.
ރައީސް ސޯލިހު ވިދާޅުވީ ފަނޑިޔާރުގެ އިސްލާހު ކުރުމުގެ މަސައްކަތް ކުރަމުން ދަނީ ތެދުވެރި، އިހުލާސްތެރި ނިޔަތެއްގައި ކަމަށާއި "އެއީ ރައްޔިތެއްގެ ކިތަންމެ ކުޑަ ޙައްޤެއް ބަޔަކު ނިގުޅައިގަތަސް، ފަނޑިޔާރުގެއިން އެ ޙައްޤެއް އަނބުރައި ހޯދައިދޭނެ ކަމުގެ، އިތުބާރާއި ޔަޤީންކަން ރައްޔިތުންނަށް ހޯދައިދިނުން" ކަމަށެވެ.
ތިން ބާރު ވަކިވެފައިވާ ނިޒާމެއްގެ ތެރެއިން ދައުލަތް ހިންގަމުން ދާއިރު، ޖުޑީޝަރީއަށް ނުފޫޒު ފޯރުވަން ސަރުކާރުން އެއްވެސް މަސައްކަތެއް ނުކުރާ ކަމަށާއި، އެފަދަ ކަމެއް ނުވެސް ކުރާނެ ކަމަށް އެމަނިކުފާނު ވިދާޅުވި އެވެ.
އެމަނިކުފާނުގެ ވާހަކަފުޅުގައި ވަނީ މިދިޔަ އަހަރުގެ ތެރޭގައި ޖުޑީޝަރީ އިސްލާހު ކުރުމަށް ކުރެއްވި މަސައްކަތް ފާހަގަކޮށް، އިތުރަށް ގިނަ ކަންކަން ކުރަން ޖެހޭ ކަމަށް ވިދާޅުވެފަ އެވެ. އަދި ޖުޑީޝަރީގެ ހިދުމަތްތައް ފަސޭހަކުރުމަށް ކުރެވުނު މަސައްކަތްތައް ވެސް ފާހަގަކުރެއްވި އެވެ.
އޭގެ އިތުރުން ރައީސް ސޯލިހު ވިދާޅުވީ އިޖުތިމާއީ މައްސަލަތައް ހައްލު ކުރުމުގައި ވެސް ޖުޑީޝަރީއަށް ބޮޑު ދައުރެއް އަދާ ކުރެވޭނެ ކަމަށާއި، އެންމެ މުހިއްމު ކަމަކީ އެކަށީގެންވާ ވަގުތުގައި އިންސާފު ގާއިމްވެގެން ދިޔުން ކަމަށެވެ.
ރައީސް ސޯލިހުގެ ވާހަކަފުޅުގެ އިތުރު ޕޮއިންޓުތައް:
- ކުޑަކުދިންނަށް ޖިންސީ ގޯނާ ކުރުމާއި އިހުމާލުވުމުގެ މައްސަލަތަކެއް ހާއްސަ ސަމާލުކަމެއް ދިނުމަށް ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަނުން ނިންމުމަކީ ރަނގަޅު ފާލެއް.
- އެފަދަ މައްސަލައެއް ކޯޓަށް ހުށަހެޅޭތާ، 24 ގަޑިއިރުގެ ތެރޭގައި އިދާރީ އިންތިޒާމުތައް ހަމަޖައްސަން ޖެހޭނެ. ޝަރީޢަތުގެ މަރުޙަލާ ފެށުމަށް ފަހު، ކޮންމެ ދެ އަޑުއެހުމެއްގެ ދެމެދު، 48 ގަޑިއިރަށް ވުރެ ގިނަ ވަގުތު ހޭދަވެގެން ނުވާނެ. އެފަދަ މައްސަލަތައް ގިނަވެގެން ހަ މަސްތެރޭގައި ކޯޓުތަކުން ނިމޭނެ.
- ޖުޑީޝަލް ސާވިސް ކޮމިޝަނުގެ ގާނޫނު އިސްލާހު ކުރަން މަޖިލީހަށް ވަނީ ފޮނުވާފައި.
- ކޯޓުތަކުގެ ޤާނޫނާއި، ފަނޑިޔާރުންގެ ޤާނޫނު އިޞްލާޙު ކުރުމުގެ ބިލުތައް ވަރަށް އަވަހަށް މަޖިލީހަށް ހުށަހެޅޭނެ.
- ފަނޑިޔާރުންގެ ނަޒާހަތްތެރިކަމަށް ހުރަސްއަޅާ ކަންކަމަށް، ފާޅުގައި ނޫނެކޭ ބުނުމުގެ ހިތްވަރު، ފަނޑިޔާރުންގެ ކިބައިގައި އަށަގަނެގެން ނޫނީ، ޢަދުލު އިންޞާފު ޤާއިމެއް ނުކުރެވޭނެ.
- ކޯޓުތަކަށް ގިނަ ދަތިތައް ވަނީ ދިމާވެފައި.
- ކޯޓު އެކުވެންޏެއް އެޅުމަށް ހުޅުމާލެއިން ކަނޑައެޅި ބިން ވަނީ ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަނާ ހަވާލުކުރެވިފައި.
- ސުޕްރީމް ކޯޓު ފިޔަވައި މާލޭގެ ހުރިހާ ކޯޓެއް ހުންނާނީ އެތަނުގައި.
- އިންސާފު ގާއިމް ކުރުމަށް ތަހުގީގު އަވަސް ކުރުން މުހިއްމު. ދައުވާ ކުރާ މުއައްސަސާގެ މަސައްކަތް ވެސް ހަލުވިވާން ޖެހޭ.