އޮޔާ ދަމައިގަނެފައިވަނީ، ގުރައިދޫގައި ގެސްޓުންނަށް ހާއްސަކޮށްފައިވާ ސަރަހައްދަކަށް މޫދަށް އެރި އުޅުނު ރަޝިއާގެ ޓޫރިސްޓެއް ކަމަށްވާ އުމުރުން 40 އަހަރުގެ ފިރިހެނެކެވެ.
އާއިލާއާއިއެކު މޫދަށް އެރި އުޅެނިކޮށް އޭނާ އޮޔާ ދަމައިގަތުމުން އޭނާގެ އަންހެނުން ވަނީ އެހީތެރިކަމަށް އެދި ގޮވާފައެވެ. އެއަޑަށް މޫދަށް އެރި އެ ފިރިހެންމީހާ ސަލާމަތްކުރީ ސަރަހައްދުގައި އުޅުނު ފުލުހެއްގެ އިތުރުން ދެ ޒުވާނެކެވެ.
އެ މަންޒަރު ފެންނަ ފޮޓޯތައް ކައުންސިލުން ހިއްސާކޮށް، އެހީތެރިވި ފަރާތްތަކަށް ޝުކުރު އަދާކޮށްފައިވާއިރު، ގިނަ ބަޔަކު ވަނީ މޫދަށް އެރި ފަތުރުވެރިޔާގެ ފުރާނަ ސަލާމަތްކޮށްދިން ތިން ޒުވާނުންގެ ހިތްވަރަށް ތައުރީފު ކޮށްފައެވެ.
ހާއްސަކޮށް އެރަށު ފުލުހެއް ކަމަށްވާ އަހްމަދު އަމަން އަބްދުﷲ ރަސްމީ ފުލުހުންގެ ޔުނީފޯމުގައި ހުރެ ވަގުތުން އެހީތެރިކަން ފޯރުކޮށްދިނުން ގިނަ ބަޔަކު ފާހަގަކުރީ އަވަސް ވިސްނުމާއި، ޒިންމާ އަދާކުރުމުގެ ނަމޫނާއެއްގެ ގޮތުގައެވެ.
ގުރައިދޫ ކައުންސިލުން ބުނިގޮތުގައި އެ ފަތުރުވެރިޔާ އޮޔާ ދަމައިގެން ސަރަހައްދަކީ ވަރަށް އޮއިބާރު ސަރަހައްދެކެވެ.
އޭނާ އަށް ވަގުތުން އެ ރަށު ސިއްހީ މަރުކަޒަށް ގެންގޮސް ފަރުވާދީފައިވާއިރު އޭނާގެ ހާލު މިހާރު ރަނގަޅެވެ. އޭނާ މިހާރު ވަނީ ފަރުވާއަށްފަހު މަރުކަޒުން ދޫކޮށްލާފައެވެ.