ކުރީގެ އެސިސްޓެންޓް ކޯޗު ސިމާއޯ މިހެން ބުނެފައިވަނީ މިއަދު ފޭސްބުކްގައި ޖެހި ދިގު ޕޯސްޓެއްގައެވެ. މޮރިއޭރޯއަށް މުސާރަ ނުދޭތާ 10 މަސް ވެއްޖެ ކަމަށް ސިމާއޯ ބުނި ނަމަވެސް އެކަމާ ގުޅޭ ގޮތުން އެއްވެސް ވާހަކައެއް ދައްކާކަށް ކޯޗު މޮރިއޭރޯ ބޭނުމެއް ނުވެއެވެ. ތަކުރާރުކޮށް އެހުމުންވެސް އެކަން ދޮގު ނުކޮށް ކޯޗު ބުނީ އޭނާ އެ ވާހަކަ ދައްކަން ބޭނުން ނުވާ ކަމަށެވެ. އެހެންނަމަވެސް އެއީ ކޮން ގޮތަކަށް ލިބުނު މައުލޫމާތެއްތޯ ކޯޗު ސުވާލު އުފެއްދިއެވެ.
ކޯޗުގެ މުސާރައިގެ އެއްވެސް މައްސަލައެއް އުޅޭތޯ ސުވާލު ކުރުމުން އެފްއޭއެމްގެ ޖެނެރަލް ސެކެއްޓްރީ ހުސެއިން ޖަވާޒުވެސް ވިދާޅުވީ މުސާރަައިގެ މައްސަލައެއް އުޅޭހެން ހީނުވާ ކަމަށެވެ. އަދި ކޯޗާއެކު އެކަހަލަ ކަންތަކާ ގުޅޭ ފުރިހަމަ އެގްރީމެންޓެއް އޮންނާނެ ކަމަށާއި މުސާރައިގެ އިޝޫއެއް އުޅޭނެއޭ ކޯޗުވެސް ނުބުނާނެ ކަމަށް ޖަވާޒް ވިދާޅުވިއެވެ.
ގައުމީ ކޯޗުގެ މުސާރައިގެ މައްސަލައެއް އުޅޭހެން ހީނުވާކަމަށް ޖަވާޒް ވިދާޅުވިއިރު، ކުރީގެ ގައުމީ ކޯޗާ، އެސިސްޓެންޓް ކޯޗު އަދި އަންހެން ގައުމީ ޓީމުގެ ކޯޗަށް މުސާރަ ނުދީގެން އެތައް މިލިއަން ރުފިޔާއެއް ދިނުމަށް ފުޓްބޯޅައިގެ މައި އިދާރާ ފީފާއިން އެފްއޭއެމަށްވަނީ އަންގާފައެވެ. އަދި މޮރިއޭރޯގެ އެސިސްޓެންޓަކަށް ހުރި ސިމާއޯ ދާދި ފަހުން މަގާމުން އިސްތިއުފާ ދިނީވެސް މުސާރަ ނުދޭ ކަމަށް ބުނެއެވެ.
އެފްއޭއެމްގައި ފައިސާގެ ސީރިއަަސް މައްސަލަތަކެއް ފެންމަތިވެފައިވާއިރު، ކްލަބުތަކަށް ދޭން އެއްބަސްވެފައިވާ ފައިސާވެސް ނުދޭ ކަމަށް ބައެއް ކްލަބުތަކުންވަނީ ބުނެފައެވެ. އަދި ބައެއް ކުުންފުނިތަކަށް ދޭން ޖެހޭ ފައިސާ ނުދީގެން ކޯޓުން ހުކުމްވެސް މި ފަހުން ކޮށްފައިވެއެވެ. އަދި ފައިސާ ނުދޭތީ ގައުމީ އެއަލައިނުންވެސް އެފްއޭއެމަށް ޓިކެޓް ވިއްކުންވެސްވަނީ ހުއްޓާލާފައި ކަމަށް މައުލޫމާތު ލިބިފައިވެއެވެ.
