އެމްޑީޕީގެ ކެމްޕެއިން "ރަށްވެހި ފަތިސް" ލޯންޗުކުރުމަށް މިހާރު ކާނިވާ ސަރަހައްދުގައި ކުރިއަށްދާ ރަސްމިއްޔާތުގައި ރައީސް ނަޝީދު ވަނީ ވަރަށް ބޮޑަށް ޑރ. މުއިއްޒަށް ފާޑުވިދާޅުވެފަ އެވެ. އެގޮތުން ޑރ. މުއިއްޒަށް، "ހޮޅި މުއިއްޒު" ގެ ނަމުން އިޝާރާތް ކުރައްވަމުން ނަޝީދު ވިދާޅުވީ މާލެ އެންމެ ފަހުން ހަލާކުކުރުމުގައި ހުންނެވީ މުއިއްޒު ކަމަށެވެ.
މިނިސްޓަރުކަމުގައި ހުންނަވައިގެން މުއިއްޒު ކުރެއްވި ކަންތައްތައް ހަނދާނުން ފިއްލަވައިގެން ނުދާނެކަން ފާހަގަކުރައްވަމުން ރައީސް ނަޝީދު ވިދާޅުވީ، މާލޭ ސިޓީ ކައުންސިލުގެ ހުރިހާ ބާރެއް މިިދިޔަ ފަސް އަހަރު ދުވަހުގެ ތެރޭގައި ނިގުޅައިގަތުމަށް ފަހު މިއަދު މާލޭ ރައްޔިތުންގެ ކުރިމައްޗަށް ވޯޓު ހޯއްދަވަން ނިކުންނަވަން ލަދުގަންނަން ޖެހޭ ކަމަށެވެ.
މާލޭ ރައްޔިތުން ޑރ. މުއިއްޒަށް ވޯޓު ނުދެއްވާނެކަމަށާއި މާލޭ ހަލާކުކޮށްލުމުގެ މޭސްތިރިއަކީ މުއިއްޒުކަން ރައިސް ނަޝީދު ތަކުރާރުކޮށް ވިދާޅުވި އެވެ.
އޭގެ އިތުރުން ރައީސް ނަޝީދު ވިދާޅުވީ އެމަނިކުފާނު އޭރުވެސް ބްރިޖް އޯކެއް ކަމަށް ވިދާޅުވެފައިވާނެ ކަމަށާއި އެގޮތުން އޯކޭ ނޫން ކަމަށް ވިދާޅުވީ ވައްކަން ކަމަށެވެ.
ނަޝީދު މިހެން ވިދާޅުވެފައި މިވަނީ ކުރިއަށް އޮތް ކައުންސިލު އިންތިހާބުގައި ޕީޕީއެމްގެ ޓިކެޓުގައި ޑރ. މުއިއްޒު މާލޭ ސިޓީ ކައުންސިލުގެ މޭޔަރު ކަމަށް ކުރިމަތިލައްވާތީ އެވެ.
ހުރިހާ ފަރާތްތަކަށް ރަނގަޅު ހެޔޮލަފައި ނަސޭހަތެއް ދެއްވަން ކަމަށް ވިދާޅުވެ، ރައީސް ނަޝީދު ވަނީ ޅެން ބައިތެއް ވިދާޅުވެފަ އެވެ.
"ނަމަނަމަ ކުޑަ ކޮއެ ފުޅާ އަތް ނުލައްޗޭ ފާރުގައި، ހަމަނިކަން ދަތުވާ ގޮތަށް ކަށިި ޖަހާފައިނޭ ބިޗޫ،" އެވެ.
އެގޮތުން ވިދާޅުވީ ޕީޕީއެމްއާ ކައުންސިލު އިންތިހާބު ހަވާލުކުރުމެކޭ ޑްރަކިއުލާއާ ބްލަބް ބޭންކެއް ހަވާލުކުރުމުގައި ތަފާތެއް ނުހުންނާނެ ކަމަށެވެ. އަދި ވިދާޅުވީ ހުރިހާ ލެޔެއް ބޯލާނެ ކަމަށެވެ.