ޔަމަނުގެ ދައުލަތާ ދެކޮޅަށް ހަނގުރާމަކުރަމުން އަންނަ ޓެރަރިސްޓް ގުރޫޕު، ހޫތީން ހަނގުރާމަ ހުއްޓާލުމުގެ އެއްބަސްވުމަށް އަމަލުކުރަން ދެކޮޅު ހެދުމުން ދިވެހި ސަރުކާރުން އެކަށް ކުށްވެރިކޮށް ފޮރިން މިނިސްޓްރީން ނެރުނު ބަޔާނެއްގައި ބުނީ އދ. ގެ ސެކްރެޓަރީ ޖެނެރަލްގެ ފަރާތުން ޔަމަނަށް ކަނޑައެޅުއްވި މަންދޫބު އެކުލަވާލެއްވި ސުލްހައިގެ އެއްބަސްވުމާ ހޫތީން ދެކޮޅު ހެދުން ބަލައިނުގަނެވޭނެ ކަމަށެވެ.
ދިވެހި ސަރުކާރުގެ ބަޔާނުގައި މީގެ އިތުރުން ބުނެފައިވަނީ ވަނީ ޔަމަނުގެ ރައްޔިތުންނަށް ސުލްހަ ލިބޭނެ ގޮތަކަށް އދ. އާއި ގަލްފު އިނީޝިއޭޓިވުން ލަފާދީފައިވާ ފަދައިން ޔަމަނުގެ މައްސަލައަށް ސިޔާސީ ހައްލު ގެންނަން ރާއްޖެއިން ތާއީދުކުރާ ކަމަށެވެ. އަދި ސައުދީ އަރަބިއްޔާއިން، ޔަމަނުގައި ސުލްހަ ގާއިމުކުރުމަށް ކުރަމުން އަންނަ މަސައްކަތްތައް ބަލައިގަންނަ ކަމަށް ވެސް ބަޔާނުގައި ވެ އެވެ.
ޔަމަންގައި ވަކި ވެރިކަމެއް ގާއިމުކުރުމަށް މަސައްކަތްކުރާ ހޫތީ ޖަމާއަތުގެ ހަނގުރާމަވެރިންނާއި ޔަމަން ސަރުކާރު ސިފައިންނާ ދެމެދު ދާހިލީ ހަނގުރާމައެއް ފެށުނީ 2014 ވަނަ އަހަރުގެ ތެރޭގަ އެވެ. ޔަމަންގެ ދާހިލީ ހަނގުރާމައިގައި މިހާތަނަށް 233،000 އަށް ވުރެ ގިނަ މީހުން މަރުވެ، އެތައް މިލިޔަން ބަޔަކު ގެދޮރު ވަނީ ގެއްލި ހާލުގައި ޖެހިފަ އެވެ.