ރައްޓެހިވެގެން ހޭދަކުރާ ވަގުތައްފަހު ކައިވެނިކޮށް ގެއަށް ބަދަލުވެ ދުވަސްވާވަރަކަށް ކައިވެނީގެ ގުޅުން "ފޫހިވެ" ދެ ފަރާތުގެ ޝަކުވާތައް އިތުރުވެ ޝަކުވާ ޒުވާބަށް ބަދަލުވެ ބައެއް ފަހަރު ވަރިއާއި ހަމައަށް ވެސް ދެއެވެ.
ކައިވެންޏަށްފަހު އެކުގައި ދިރިއުޅެން ފަށާއިރު, އެކަކު އަނެކަކާ ދިމާވާ މިންވަރު މަދުވުން އަދި މާގިނައިން ދިމާވުމަކީ ވެސް މައްސަލަތަކަކާ ދިމާވެދާނެ ކަމެކެވެ. މިސާލަކަށް ގޭގައި މަސައްކަތްކުރާނަމަ ދެމަފިރިން ދިމާވާ މިންވަރު އާދަޔާ ހިލާފަށް އިތުރުވާނެއެވެ. އަދި ބިޒީކޮށް ބޭރުގައި މަސައަތްކުރާ ނަމަ އެއްގޮތަކަށް ވެސް ދިމާނުވުމަކީ ވެސް އެކަށީގެންވާކަމެކެވެ.
މިފަދަ ކަންކަމުގެ ސަބަބުން ދިމާވާ މައްސަލަތައް ހައްލުކުރަން އޮތް އެންމެ ރަނގަޅު ހައްލަކީ ކައިވެންޏަށްފަހު ވެސް އެކަކުއެނެކަކާ ޑޭޓްކުރުން ހުއްޓާނުލުން ކަމަށް ކަމާގުޅޭ މާހިރުން ބުނެއެވެ.
ކައިވެންޏަށް ފަހު ވެސް ރައްޓެހިވެގެން އުޅޭއިރު އުޅޭގޮތައް ކޮންމެވެސް މިންވަރަކަށް އުޅެން ވާނެއެވެ.
ދުރާލައި ޑޭޓް ކުރާނެ ރޭތައް ރޭވުން:
މާހިރުން އެއްބަސްވާ ގޮތުގައި މިކަން ކުރުމަށް އެންމެ ރަނގަޅު އެއް ގޮތަކީ ޑޭޓަށް ދާނެ ރޭތައް ސެޓްކޮށް، ޑައިރީތަކުގައި ޝެޑިއުލް ކުރުމެވެ.
މީގެ އިތުރުން ސައިކޯސެކްޝަނަލް ތެރަޕިސްޓް އަދި ކަޕްލްސް ކައުންސެލަރު ކޭޓް މެކެންޒީ ފާހަގަކުރާ ގޮތުގައި ޑޭޓަށް ކުރިން ޕްލޭން ކުރުމަކީ ވެސް އެކަމަށް ފޯރި އުފެއްދުމަށް މަގުފަހިކޮށްދޭ ކަމެކެވެ. މީހަކު ކަމެއް ކުރަން ވަގުތު ކިއުމުން ސިކުނޑީގައި އެކަމަކާ ގުޅޭ ހިޔާލާއި ތަސައްވަރުވެސް ދުރާލާ އުފެދޭނެއެވެ.
މިގޮތައް ޕްލޭން ކުރުމުން ދެމަރިންގެ މެދުގައި މުއާސަލާތުކުރުން ވެސް ރަނގަޅުވެއެވެ. އަދި ކޭޓް ބުނާގޮތުން ޕްރީ ޑޭޓް ޓެކްސްޓް (ނުވަތަ ސެކްސްޓިން) އަށް ވެސް ހިތްވަރު ލިބޭ ކަމެކެވެ. މިއީ އެކަކު އަނެކަކަށް ކުރާ އިންތިޒާރު އިތުރުކޮށް، ފްލާރޓިން ވެސް އަލުން ރޯކޮށްލާ ކަމެކެވެ.
ޑޭޓުތަކުގައި ހޭދަކުރާ ވަގުތުތަކުގައި ގޭތެރޭގެ އާދައިގެ މަސައްކަތްތަކާއި ނުވަތަ އުނދަގޫވާ ކަންތައްތަކުގެ ވާހަކަ ނުދައްކާށެވެ.
“ފޯނުތައް ބާއްވާފައި އެކަކު އަނެކަކާ އެކު އެވަގުތުކޮޅުގެ ހޭދަކޮށްލަން" ކޭޓް ލަފާދެއެވެ.
ގޭގައި ވެސް ޑޭޓް ކުރެވިދާނެ:
ރައްޓެހިވުމަށް ވަކި ތާރީހަކާއި ގަޑިއެއް ކަނޑައެޅުމަކީ ރަނގަޅު ކަމެއް ނަމަވެސް، ރައްޓެހިވެގެން އުޅޭއިރު ވެސް އަބަދު ދެމީހުން އުޅެނީ ބޭރަކު ނޫނެވެ. މިހެން ކަމުން ކައިވެނިކޮށްގެން ވެސް ދެމީހުންނަށް ގޭގައި ވެސް ޑޭޓް ތަކެއް ކުރެވިދާނެއެވެ.
ލަންޑަނުގެ އުމުރުން 30 އަހަރުގެ ވެރޮނިކާ ބުނާ ގޮތުގައި އޭނާ އާއި އޭނާގެ ލޯބިވެރިޔާ އުމުރުން 33 އަހަރުގެ އޭޑަމް ގިނައިން ފިލްމު ނައިޓްތައް ގޭގައި އިންތިޒާމް ކުރަނީ، ދެމީހުން ވެސް މަސައްކަތަށް ގިނައިން ދުރުގައި ތިބެން ޖެހޭތީއެވެ.
ގޭގައި ޑޭޓްކުރުމަކީ ކޮންމެހެން ފޫހިވާންޖެހޭ ކަމެއް ނޫނެނެވެ.
މިގޮތުން ގޭގައި ތީމް ފުޑް ނައިޓެއް އިންތިޒާމް ކުރުން ނުވަތަ ރާޒުވާ ފަދަ ބޯޑް ގޭމް ނައިޓެއް ވެސް އިންތިޒާމް ކުރެވިދާނެއެވެ. އަދި ދެމަފިރިން މެދުގައި ޖިންސީ އެދުމަށް މަގުފަހިވާކަހަލަ ގޭމެއް ވެސް ކުޅެވިދާނެއެވެ.
ކޭޓް ބުނަނީ ދެމަފިރިން ހަފްތާއަކު އެއްފަހަރު ނުވަތަ ކޮންމެ ދެ ހަފްތާއަކުން ޑޭޓް ނައިޓްސް އިންތިޒާމްކޮށްގެން އެކަކު އަނެކަކު އުފާކޮށްދިނުން މުހިންމުކަމަށެވެ.