މިކަން މިހެން އޮތްނަމަވެސްް އަނިޔާވެރިންނާއި ފާސިގު ނުބައި މުޖުރިމުން ހާލަކުނުކުރައްވައި މާތްﷲ އެމީހުންނަށް މުހުލަތު ދެއްވަނީ ކީއްވެތޯ؟ އިސްލާމުދީނާއިމެދު ޝައްކު އުފައްދާ މީހުން ސުވާލު ކުރާކަން ހުތުބާގައި ފާހަގަކުރި އެވެ.
ނަމަވެސް އެފަދަ މީހުންނަށް މާތްﷲ ކަނޑައަޅުއްވާފައިވާ މުހުލަތު ޖެހުމާއިއެކު ގަދަފަދަ ހިއްޕެވުމަކުން ހިއްޕަވާނެކަން ފާހަގަކޮށް ހުތުބާގައި ބުނީ، އެ މުހުލަތު މާތްﷲ ކަނޑައަޅާފައިވާ ދުވަހަށްވުރެ އަވަހެއް ނުވަތަ ލަހެއްވެސް ނުވާނެ ކަމަށެވެ.
އަދި އެފަދަ މީހުންގެ ހިއްޕެވުމުގެ ގަދަފަދަކަން ވަނީ އެމީހުންގެ އަނިޔާވެރިކަމާއި ގުޅިފައި ކަމަށް ހުތުބާގައި ބުންޏެވެ. މީގެ އިތުރުން އަނިޔާވެރިންގެ ކިބައިން އަނިޔާ ލިބުނު މީހުންނަށް ޖެހުނު ވޭނަށްވުރެ އަނިޔާވެރިޔާއަށް މާތްﷲ ދެއްވާ އުގޫބާތް ގަދަފަދަ ވެގެންވާކަން ހުތުބާގައި ފާހަގަކުރި އެވެ.
ހުތުބާގައި ބުނިގޮތުން މާތްﷲ އަނިޔާވެރިންނަށް އުގޫބާތް ދެއްވަނީ، މަޑުމަޑުން ހަލާކުގެ ތެރެއަށް ވައްޓަވައިލައްވައިގެން ނެވެ. މާތްﷲ ދެއްވާ އުގޫބާތުގެ މުހުލަތު ޖެހުމުން އެކަމުން އޭނާއަށް ރެކި ނުގަނެވޭނެ އެވެ. އެ އުގޫބާތް ދުނިޔޭގައިވެސް ލިބިދާނެ އެވެ. އާހިރަތުގައި ވެސް ލިބިދާނެ އެވެ. އަދި ދެ ދުނިޔޭގައި ވެސް ލިބިދާނެ އެވެ.
އަދި އަނިޔާވެރިންނަށް އުގޫބާތް ނުދެއްވާ ލަސްކުރައްވަނީ މާތްﷲގެ އަޒާބުގެ މައްޗަށް ރަހުމަތްފުޅު އިސްކުރައްވައިގެން ކަމާއި، ނުވަތަ ކަންތައް ބޮޑުވެ، ލޯތައް ހުޅުވޭ ދުވަހަކަށް އޭނާއަށް އުގޫބާތް ގަަދަފަދަ ކުރެއްވުމަށްޓަކައި ކަން ހުތުބާގައި ފާހަގަކުރި އެވެ.
