ސަރުކާރުގެ ފަރާތުން ހުށަހަޅާފައިވާ އެއްމެދު އިމާރާތުގެ ބިލަށް ވާހަކަ ދައްކަވަމުން މެމްބަރު އިބްރާހިމް ރަޝީދު ވިދާޅުވީ، މާލޭގެ އެތައް ރައްޔިތަކު ބޯހިޔާވަހިކަން ބޭނުންވެފައި އެބަތިބި ކަމަށެވެ. އަދި އާދައިގެ ފްލެޓެއް ވެސް ރައްޔިތުންނަށް ނުލިބިގެން އުޅޭކަމަށް ވިދާޅުވި އެވެ.
މާލޭގެ ރައްޔިތުންނަށް ބޯހިޔާވަހި ކަމުގެ މައްސަލައަށް ހައްލެއް ނުލިބި އޮތީ ހައުސިން މިނިސްޓަރުގެ އިހުމާލުން ކަމަށް ވިދާޅުވި އެވެ. މެމްބަރު އިބްރާހިމް ރަޝީދު ވިދާޅުވީ ރައްޔިތުން ވޯޓު ދިނީ ރައީސަށް ކަމަށާއި އެހެން ނަމަވެސް ރައީސް ބޭނުންވާ ވަޒީރުން އައްޔަނު ކުރުމުގެ އިހުތިޔާރު އެމަނިކުފާނަށް ނެތް ކަމަށް ވިދާޅުވި އެވެ.
ހައުސިން މިނިސްޓަރުގެ އިސްތިއުފާއަށް މެމްބަރު އިބްރާހިމް ރަޝީދު ގޮވާލެއްވި އިރު، އިއްޔަ ކުރިއަށްދިޔަ މަޖިލީހުގައި ކަނޑިތީމު ދާއިރާގެ މެމްބަރު އަބްދުﷲ ޝަހީމް ވަނީ ފިޝަރީޒް މިނިސްޓަރު ޒަހާ ވަހީދުގެ އިސްތިއުފާއަށް ގޮވާލައިފައެވެ.
ހައުސިން މިނިސްޓަރު އާތިފާ އާއި ފިޝަރީޒް މިނިސްޓަރު ޒަހާ އަކީ އެމްއާރްއެމްގެ ސްލޮޓްގައި ވަޒީރުންގެ މަޖިލީހުގައި ތިއްބެވި ބޭފުޅުންނެވެ.