ކުރިއަށް އޮތް ލޯކަލް ކައުންސިލް އިންތިހާބަށް ޕްރޮގްރެސިވް ކޯލިޝަންގެ ކެމްޕެއިން ލޯންޗު ކުރުމަށް ބޭއްވި ޖަލްސާގައި މިރޭ އަބްދުއްރަހީމް ވިދާޅުވީ، އެމްޑީޕީ ވެރިކަަމަށް ގެނައުމަށް ރެއާ ދުވާލު ނުނިދާ މަސައްކަތްކުރި ރައްޔިތުން މިއަދު މަގުމަތިވެފައިވާ ކަމަށައި އެގޮތުން އެމީހުން ކުރަމުން އަންނަ ޝަކުވާއަކީ ވަޒީފާގެ ފުރުސަތު ނުލިބޭ ކަމަށާއި އެގޮތުން އާމްދަނީ ހޯދޭނެ ގޮތެއް ވެސް އެމީޙުންނަށް ނެތް ކަމަށެވެ.
އެގޮތުން އެ ސަބަބުތަކާހުރެ މިއަދު އެ ރައްޔިތުން ވެސް ބޭނުންވަނީ ސަރުކާރު ބަދަލުކުރަންކަން ފާހަގަކުރައްވާ އަބްދުއްރަހީމް ވިދާޅުވީ، އެފަރާތްތަކުން ވެސް ބުނަމުން އަންނަނީ ރައީސް ޔާމީންގެ ވެރިކަން މާރަނގަޅު ކަމަށެވެ. އެގޮތުން ރައީސް ޔާމީންގެ ވެރިކަމުގައި ވަޒީފާ ލިބުން ކަމަށާއި އަދި އާމްދަނީ ހޯދޭނެ ގޮތްތައް ވެސް އޮތްކަމަށް ވިދާޅުވި އެވެ.
އޭގެ އިތުރުން އަބްދުއްރަހީމް ވިދާޅުވީ މިއަދު ވިޔަފާރިވެރިން ބުނަމުން އަންނަނީ އިގްތިސާދު ފުނޑިފައިވާ ކަމަށާއި އެގޮތުން ކުދި އަދި މެދުފަންތީގެ ވިޔަފާރިތައް ވެސް ފުނޑިއްޖެކަމަށެވެ. އަދި ބައެއް ވިޔަފާރިތައް ވެސް ބަންދުކުރަން ޖެހިފައިވާކަން ފާހަގަކުރަމުން އިތުރަށް ވިދާޅުވީ ރާއްޖެއަށް ފައިސާ ވަންނާނެ ގޮތެއް ވެސް ނެތް ކަމަށެވެ.
މި ޖަލްސާގައި މަސްވެރިކަމަށް އަލިއަޅުވާލާ އަބްދުއްރަހީމް ވިދާޅުވީ މަސްވެރިން އުޅެމުން އަންނަނީ ވަރަށް ހާލުގައި ކަމަށާއި އެގޮތުން އަތްވާ ވާރޭގައި އެމީހުން ކުރާ މަސައްކަތަށް ހަމައަގު ވެސް ނުލިބޭ ކަމަށެވެ.