އެ މަނިކުފާނުގެ ރަނިން މޭޓަކަށް ވެވަޑައިގަންނަވާނީ އައްޑޫ ބޭފުޅެއް ކަމަށް ނަޝީދު ވިދާޅުވިނަމަވެސް ކަނޑައެޅިގެން ކޮން ބޭފުޅެއް ކަމެއް ވިދާޅެއް ނުވެއެވެ. އެހެންކަމުން ހިތުގައި މިހާރު އުފެދޭ ސުވާލަކީ، ރައީސް ނަޝީދު އެ ވިދާޅުވާ އައްޑޫ ބޭފުޅަކީ ޕްރޮފެސަރު އުގައިލްތޯއެވެ؟
އުގައިލްއަކީ އައްޑޫ ބޭފުޅެއް، ޒުވާނެއް، އަދި މުޅި ރާއްޖެ ތަމްސީލް ކުރެވޭ ބޭފުޅެއް
ޕްރޮފެސަރު ހަސަން އުގައިލްއަކީ ދިވެހިންގެ ގިނަ ބަޔަކު ދަންނަ ނަމެކެވެ. އެތައް ދިވެހިންނެއްގެ ލޯތްބާއި އިހުތިރާމް ހޯއްދަވައިގެން ހުންނެވި ބޭފުޅެކެވެ. ހިސާބާއި ސައިންސްގެ ރޮނގުން ދުނިޔޭގެ ފެންވަރުގައި ވެސް ނަން ވިދާ ޝަހްސިއްޔަތެކެވެ. ރާއްޖޭގެ ނަން ބައިނަލްއަގްވާމީ އުދަރެހުގައި ޝަރަފްވެރިކޮށްދެއްވަމުން އަންނަ އައްޑޫގެ ދަރިއެކެވެ.
ރައީސް ނަޝީދުގެ ރަނިން މޭޓަކަށް ޕްރޮފެސަރު އުގައިލް ވެދާނެ ވެދާނެތޯ ނުވަތަ، ރައީސް ނަޝީދު އެ ވިދާޅުވާ އައްޑޫ ބޭފުޅަކީ އުގައިލްތޯ އުފެދޭ ސުވާލުގެ ޖަވާބު އަދި ނުލިބުނަސް ޔަގީނުންވެސް ސާފުވާ އެއް ކަމަކީ، ރައީސް ނަޝީދު ވިދާޅުވި ސިފަތައް ޕްރޮފެސަރު އުގައިލްގެ ފުރިހަމަވާ ކަމެވެ.
މުޅި ދިވެހި ރާއްޖެ ތަމްސީލް ކުރެވޭ، ރަމްޒުވާ ބާވަތުގެ ބޭފުޅެއް. މިހާރު އަޅުގަނޑުވެސް އުމުރުން ދޮށިވަމުން މި ދަނީ. އެހެންވީމާ އަޅުގަނޑުވެސް އެބަދެކެން ޒުވާނުންގެ ހިއްސާ ވަރަށް ބޮޑުވާން ޖެހޭ ކަމަށް. ދެން އަޅުގަނޑު އުއްމީދުކުރަން އަޅުގަނޑުމެންނަށް ކާމިޔާބު ރަނިން މޭޓަކާއެކީގައި ކުރިއަށް ދެވޭނެ ކަމަށް- ރައީސް ނަޝީދު
2008 ވަނަ އަހަރުގެ ރިޔާސީ އިންތިހާބުގައި ރައީސް މުހައްމަދު ނަޝީދުގެ ރަނިން މޭޓަކަށް ވެވަޑައިގެންނެވީ، ރައީސް ނަޝީދު އިސްތިއުފާ ދެއްވުމުން ރައީސް ކަމަށް އިސްކުރެވުނު ޑރ. މުހައްމަދު ވަހީދު ހަސަން މަނިކެވެ. އޭގެ ފަހުން 2013 ވަނަ އަހަރު ރައީސް ނަޝީދުގެ ރަނިން މޭޓަކަށް ކަނޑައެޅުއްވީ ޑރ. މުސްތަފާ ލުތުފީއެވެ. 2013 ވަނަ އަހަރުގެ އިންތިހާބުގައި ރަނިން މޭޓެއްގެ ކަންތަކުގައި ރައީސް ނަޝީދު ވިދާޅުވެފައިވަނީ ރަނިން މޭޓެއް ކަނޑައަޅުއްވާއިރު، ވަފާތެރި، އެމްޑީޕީގެ އުސޫލުތައް ގަބޫލު ކުރާ މީހެއް ކަމުގައި ވާން ޖެހޭނެ ކަމަށް ދެކެވަޑައިގަންނަވާ ކަމަށެވެ.