ރާއްޖޭގެ ޗެމްޕިއަން މާޒިޔާއާއި، އިންޑިޔާގެ އައިލީގުގެ މިދިޔަ ސީޒަންގެ ޗެމްޕިއަން ޗެންނާއީ ސިޓީ އެފްސީ ވާދަކުރާ މެޗު އޮންނާނީ މިރޭ ޗެންނާއީގެ ޖަވާހިރުލާލް ނެހްރޫ ސްޓޭޑިއަމްގަ އެވެ. މެޗު ފެށޭނީ ރާއްޖޭ ގަޑިން ހަތެއް ޖަހާއިރު އެވެ. މި މެޗު ކުޅެން މާޒިޔާއިންވަނީ ހޮނިހިރު ދުވަހު އިންޑިޔާއަށް ގޮސްފަ އެވެ. އަދި އިއްޔެ މާޒިޔާއިންވަނީ ޖަވާހިރުލާލް ނެހްރޫ ސްޓޭޑިއަމްގައި އެންމެ ފަހުގެ ފަރިތަކުރުންތައް ބާއްވާ މެޗަށް ފުރިހަމައަށް ތައްޔާރުވެފައި ކަމަށް ކެޕްޓަން އިރޭ ބުންޏެވެ.
މާޒިޔާއިން އޭއެފްސީ ކަޕުގެ ގްރޫޕް ސްޓޭޖުން ފުރުސަތު ހޯދީ ޕްރިމިލިނަރީ ބުރުގައި ބަންގާޅުގެ އަބަހާނީ ލިމިޓެޑް އަދި ޕްލޭ އޮފް ގައި އިންޑިޔާގެ ބެންގަލޫރު އެފްސީ ކަޓުވާލުމަށް ފަހު އެވެ. މިއީ މާޒިޔާ އޭއެފްސީ ކަޕުގައި ވާދަކުރާ ހަތްވަނަ ފަހަރެވެ. މާޒިޔާ ނޫނީ މި ގްރޫޕްގައި ދެން މުޅިންވެސް ހިމެނެނީ މުޅިން އަލަށް އޭއެފްސީ ކަޕުގައި ކުޅޭ ޓީމުތަކެވެ. އެއީ ރާއްޖޭގެ ޓީސީ ސްޕޯޓްސްއާ، ބަންގާޅުގެ ބަޝަންދުރާ ކިންގްސް އަދި އިންޑިޔާގެ ޗެންނާއީ ސިޓީ އެފްސީއެވެ. ޗެންނާއީ ސިޓީ އެފްސީގެ ކޯޗު އަކްބަރު ނަވާސްއަކީ ސިންގަޕޫރު މީހެކެވެ. ނަވާސްއަކީ މީގެ ކުރިން އޭއެފްސީ ކަޕުގައި ރަނގަޅު ކާމިޔާބެއް ހޯދާފައިވާ ކޯޗެކެވެ. 2016 ވަނަ އަހަރު ސިންގަޕޫރުގެ ޓެމްޕިނަސް ރޯވާސްއާއި އެކު މުބާރާތުގެ ކުއާޓަރ ފައިނަލަށް ދަތުރުކުރި އެވެ.