އޭސީސީންވަނީ ވާވެއްދި ފަޅާ ގުޅޭ ތަހުގީގެއް ކުރަމުން އަންނަކަން ކަށަވަރުކޮށްދީފައެވެ. އެހެންނަމަވެސް ހިނގަމުންދާ ތަހުގީގަކަށް ވާތީ އެ ތަހުގީގާ ގުޅޭ އިތުރު ތަފްސީލެއް ނުދެ އެވެ. ވާވެއްދިފަޅާ ގުޅޭ މައްސަލައެއް ކުރިންވެސް އޭސީސީން ތަހުގީގު ކުރިއެވެ. އެހެންނަމަވެސް އެ މައްސަލަވަނީ ފައިލްކޮށްފައިއެވެ.
މައުލޫމާތު ލިބިފައިވާ ގޮތުގައި ވާވެއްދިފަޅުގެ މައްސަލަ ބަލަން ފެށީ އެ ތަން ވިއްކާލަން ވިލާ ކުންފުނިން މި ފަހުން ނިންމި ނިންމުމަކާ ގުޅުވަ އެވެ. ސަރުކާރުން ވިލާ އަށް ދޫކުރި ރަށްތަކުގެ ތެރެއިން ވާވެއްދިފަޅު އަތުލީ ރައީސް އަބްދުﷲ ޔާމީންގެ ވެރިކަމުގައެވެ. 2015 ވަނަ އަހަރުގެ ޑިސެމްބަރު މަހު އެ ފަޅު އަތުލީ، ދޫކުރި ބޭނުމާ އެއްގޮތަށް މަސައްކަތް ކުރިއަށް ނުދާ ކަމަށް ބުނެ އެވެ. ސަރުކާރުން އެއްބަސްވުން ބާތިލްކުރީ ގާނޫނާ ހިލާފަށް ކަމަށް ބުނެ ހުށަހެޅި މައްސަލައިގެ ޝަރީއަތުގެ މަރުހަލާތަކަށް ފަހު، ސުޕްރީމް ކޯޓުން ނިމުނީ ވިލާ ކުންފުންޏާ އެއްކޮޅަށެވެ.
ވާވެއްދިފަޅު ވިއްކުން ހުއްޓުވުމުން ވިލާ ކުންފުނީގެ ވެރިޔާ ގާސިމް ވަނީ ސަރުކާރަށް ވަރަށް ބޮޑަށް ފާޑުވިދާޅުވެފަ އެވެ. ގާސިމް އެންމެ ބޮޑަށް ހިތްހަމަނުޖެހުން ފާޅުކުރެއްވީ މި ސަރުކާރުން ވެސް އޭނާގެ ވިޔަފާރިއަށް އަމާޒުކޮށް ގެއްލުން ދޭން ފަށާފައިވާ ކަމުގެ ތުހުމަތުކޮށެވެ.
އޭސީސީން އެ ފަޅު ވިއްކުން ހުއްޓުވުމަކީ ސަރުކާރުން ކުރި ކަމެއްގެ ގޮތުގައި ސިފަކުރައްވައި ގާސިމް ވާހަކަ ދެއްކެވިޔަސް އެ ތުހުމަތު ސަރުކާރުން ދޮގުކުރެ އެވެ. ރައީސް އޮފީހުގެ ތަރުޖަމާން މުހައްމަދު މިއުވާން ވިދާޅުވީ މިނިވަން މުއައްސަސާތައް މި ސަރުކާރުގައި މަސައްކަތްކުރާނީ ގާނޫނުގައި ކަނޑައަޅާފައި އޮންނަ ގޮތަށް މިނިވަންކަމާ އެކުގައި ކަމަށެވެ.
