ކޮރޯނާވައިރަހުގެ ސަބަބުން މިމަހުގެ 19 ވަނަ ދުވަހުން 26 ވަނަ ދުވަހުގެ ނިޔަލަށް ސަރުކާރު ބަންދުކުރުމަށް އިއްޔަ ނިންމާފައިވާއިރު، މިއަދު ރައްޔިތުންގެ މަޖިލީހުގެ ޖަލްސާ ފައްޓަވަމުން ރައީސް ނަޝީދު ވަނީ އެ ހާލަތުގައި މަޖިލިސް ކުރިއަށް ދާނެ ގޮތް ހާމަކުރައްވާފައެވެ.
އެގޮތުން ވާހަކަ ދައްކަވަމުން ރައީސް ނަޝީދު ވިދާޅުވީ، މަޖިލީހުގެ ގަވައިދުގެ 247 ވަނަ މާއްދާގައި މަޖިލީހުގެ ޖަލްސާތައް މެދުކަނޑާލުމުގެ ބާރާއި އިހްތިޔާރު މަޖިލީހުގެ ރިޔާސަތަށް ލިބިގެންވާކަމަށެވެ. ރައީސް ނަޝީދު ވިދާޅުވީ މަޖިލިސް ބަންދު ނުވާކަމަށާއި، އަދި މިބާވަތުގެ ހައްސާސް ވަގުތެއްގައި މަޖިލިސް ބަންދު ނުކުރެވޭނެ ކަމަށެވެ.
ރައީސް ނަޝީދު ވިދާޅުވީ، ވެދާނެ ކަންކަމަށް މަޖިލީހުން ތައްޔާރަށް ތިބެންޖެހޭ ކަމަށެވެ. ރައީސް ނަޝީދު ވިދާޅުވީ ބާވަންޖެހޭ ހާލަތުގައި މަޖިލީހުގެ ޖަލްސާތައް ބާއްވާނެ ކަމަށެވެ. އަދި މަޖިލީހުގެ މުވައްޒަފުންނަށް ގޭގައި ތިބެގެން މަސައްކަތްކުރެވޭނެ އިންތިޒާމު ހަމަޖައްސަމުން އަންނަކަމަށް ވިދާޅުވި އެވެ.
ރައީސް ނަޝީދު ވިދާޅުވީ މަޖިލީހުގެ ގާނޫނީ މައްސޫލިޔަތު އަދި ޒިންމާ މަޖިލީހުން އަދާކުރާނެ ކަމަށެވެ.
ސަރުކާރު ހަފްތާއަކަށް ބަންދުކުރުމަށް ނިންމާފައިވާއިރު ސިޔާސީ އެކި މަގާމުތަކުގައި ތިއްބަވާ ފަރާތްތަކުގެ މުސާރައިން 20 އިންސައްތަ އުނިކުރުމަށް ވެސް ސަރުކާރުން ވަނީ ނިންމާފައެވެ.