ސީއެންްއެމްގެ "އިތުރުކާފު" ޕްރޮގްރާމްގައި ވާހަކަ ދައްކަވަމުން އާތިފް ވިދާޅުވީ މިވަގުތަށް އެންމެ އިސްކަމެއްދީގެން އެހީ ފޯރުކޮށްދޭންވީ ވަޒީފާ ގެއްލިފައިވާ މީހުންނާއި، ކުލިދައްކަން އުނދަގޫ ފަރާތްތަކާއި އެންމެ ކުޑަ ވިޔަފާރަވެރީންނަށް ކަމަށެވެ.
"ސްޓިމިޔުލަސް ޕެކެޖް ރަނގަޅީ ގޭގެ ވެރިމީހާއަށް ދިނުމުގެ ބަދަލުގައި، އާންމު މީހާއަށް، ކުލި ދައްކާ މީހާ އަށް ރައްދު ކޮށްދެވުނިއްޔާ. ނޫނީ ރިސޯޓް އޯނަރ މީހުން ވަޒީފާއިން ވަކިނުކުރާށޭ ބުނެ އޭނާޔަށް ދިނުން.. މިކަހަލަ ކަންކަން ކުރީމާ އޭގެ ނަތީޖާ ފަހިނޫންކަން އެހެން ގައުމުތަކުގެ ތަޖުރިބާއިން އެނގޭ."
ރިސޯޓު މުވައްޒަފުންގެ ތެރެއިން 11،000 މަސައްކަތްތެރިންގެ ވަޒީފާއިން ވަކިކުރާކަމުގެ ރިޕޯޓުތަކަށް ނިސްބަތްކުރައްވާ އާތިފް ވިދާޅުވީ އޭގެތެރެއިން ބައިކުޅަބައެއްގެ ވަޒީފާ ގެއްލުނު ނަމަވެސް ކުލިދައްކާ އާއިލާއާ އެކު އެތައް ބަޔަކަށް ލޮޅުން އަރާނެ ކަމަށެވެ.
ކޮވިޑް-19 ގެ ދަތިތަކުން އަރައިގަތުމަށް ރައީސް އިބްރާހިމް މުހައްމަދު ސޯލިހް ވަނީ 2.5 ބިލިއަން ރުފިޔާގެ އިކޮނޮމިކް ރިކަވަރީ ޕެކޭޖެއް އިއުލާނުކޮށްފައެވެ. މީގެތެރެއިން އާތިފް ވިދާޅުވީ އެހީ އޭގެ އެންމެ ހައްގުވެރިންނަށް ފޯރުކޮށްދިނުމަށް ދިމާވާ އެންމެ ބޮޑުދައްޗަކީ އެފަދަ މީހުންނަކީ ކޮބައިކަން ފަސޭހައިން ވަކިކޮށް ލިސްޓުކުރެވޭނެ ގޮތެއް ނެތުން ކަމަށެވެ.
ސަރުކާރުންދޭ އެހީތަކުގެ ތެރެއިން އިންޓަނެޓްގެ އަގުހެޔޮކުރުމަށް ސީދާ ސަބްސިޑީއެއް ދިނުމާއި ބޭންކް އޮފް މޯލްޑިވްސް އިން ލޯން މުއްދަތު ހަމަހަށް ފަސްކުރުމުން އެއްވެސް އިންޓްރެސްޓެއް ދައްކަން ނުޖެހޭނެ ގޮތް ހަމަޖައްސާނެ ކަމަށް އުއްމީދު ކުރައްވާކަމަށް އާތިފް ވިދާޅުވި އެވެ.