ސައުދީ ޕްރޯ ލީގުގެ ކްލަބުތަކުން މެންޗެސްޓަރ ސިޓީގެ މިޑްފީލްޑަރު ކެވިން ޑިބްރޭނާ ހޯދުމަށް މީގެ ދުވަސްކޮޅެއް ކުރިންވަނީ ޝައުގުވެރިކަން ފާޅުކޮށްފައެވެ. އުމުރުން 32 އަހަރުގެ ޕްލޭމޭކަރަކީ 2025 ވަނަ އަހަރުގެ ނިޔަލަށް ސިޓީގެ ކޮންޓްރެކްޓްގައި ހުރި ކުޅުންތެރިއެކެވެ. އެނގިފައިވާ ގޮތުގައި ސައުދީ ކްލަބުތަކުގެ ލީގުގެ މަގުބޫލުކަން އިތުރުކުރުމަށް އަންނަ ސީޒަނަށް ބޮޑެތި ހަރަދުތަކެއް ކުރަން ތައްޔާރުވަމުންދާއިރު ޑިބްރޭނާއަކީ އެ މީހުންގެ ޓޮޕް ޓާގެޓެކެވެ. ރިޕޯޓްތައް ބުނާ ގޮތުން ސައުދީ ކްލަބުތަކުން 100 މިލިއަން ޕައުންޑް އަގެއް އޭނާއަށް ހުށަހެޅުމަށް ތިބީ ތައްޔާރަށެވެ.
މިހެން މިކަން އޮއްވައި، ޑިބްރޭނާވަނީ ކްލަބު ބަދަލު ކުރުމަކީ އެކަށީގެންވާ ކަމެއް ކަމަށް ބުނެފައެވެ. ޑިބްރޭނާ ބުނީ ކެރިއަރުގައި ފަހުކޮޅަށް ދާއިރު، ސައުދީ ހުށަހަޅާފައިވާ ހުށަހެޅުމަކަށް މާލީ ގޮތުން ބަލާއިރު ދެކޮޅު ހަދަން އުނދަގޫ ހުށަހެޅުމެއް ކަމަށެވެ. އަދި އެއީ އޭނާއާއި އޭނާގެ އާއިލާވެސް ބޭނުންވާ ކަމެއް ކަމަށް ޑިބްރޭނާވަނީ ބުނެފައެވެ.
ޑިބްރޭނާ ވަނީ ސިޓީއާއެކު ހަ ލީގު ތަށި އަދި ޗެމްޕިއަންސް ލީގު ހިމެނޭ ގޮތަށް ބޮޑު 14 ތަށި ހޯދައިފަ އެވެ. މެންޗެސްޓާގައި ހޭދަކުރި ނުވަ އަހަރު ދުވަހުގެ ތެރޭގައި ބެލްޖިއަމްގެ ގައުމީ ޓީމުގެ ކުޅުންތެރިޔާ ވަނީ ހުރިހާ މުބާރާތެއްގައި 300 އަށްވުރެ ގިނަ މެޗު ކުޅެ 100 ވަރަކަށް ލަނޑު ޖަހާފައެވެ.
