ގާނޫނުލް އުގޫބާތުގެ ދަށުން އަދަބުގެ ބާވަތް ބަދަލު ކުރެވޭތޯ މަސައްކަތް ކުރައްވަމުން ގެންދަވާ ކަމަށް ޕްރޮސެކިއުޓާ ޖެނެރަލް ހުސައިން ޝަމީމް ވިދާޅުވެއްޖެ އެވެ.

ޖަލު ހުކުމް ތަންފީޒު ކުރާ މީހުންގެ އަދަދު ގިނަވެ، ޖަލުތައް ފުރޭ މައްސަލަ ހައްލު ކުރުމަށްޓަކައި މަސައްކަތް ކުރައްވާކަން ހާމަކުރައްވާ ޕީޖީ ކުރެއްވި ޓްވީޓެއްގައި ވިދާޅުވީ ގާނޫނުލް އުގޫބާތުގެ ދަށުން ޖަލު ހުކުމް އަދަބު އެހެން ބާވަތުގެ އަދަބަކަށް ބަދަލު ކުރުމުގެ ފުރުސަތު ބައެއް މައްސަލަތަކުގައި އޮންނަ ކަމަށެވެ.

އެހެންކަމުން އެކަމާ ގުޅޭ ގޮތުން ބަންޑާރަ ނައިބުގެ އޮފީހާއި ހޯމް މިނިސްޓްރީ އާއެކު ޕްރޮސެކިއުޓާ ޖެނެރަލްގެ އޮފީހުން މަސައްކަތް ކުރަމުންދާ ކަމަށް ޝަމީމް ވިދާޅުވި އެވެ. އަދި ހުރިހާ މުއައްސަސާތަކެއް ގުޅިގެން ޖަލުތައް ފުރޭ މައްސަލައަށް ހައްލު ހޯދަން ޖެހޭ ކަމަށް އޭނާ ވިދާޅުވި އެވެ.

Penal code (section 1005) allows for conversion of punishments to non-custodial sentences wherever possible. @PGO_MV is working with @AGOmv and @HomeMinistrymv to explore these options. Together, we shall find a solution to prison congestion! pic.twitter.com/5UHYdj217b

— Hussain Shameem (@HuShameem) December 24, 2019

ގާނޫނުލް އުގޫބާތު ބުނާ ގޮތުން ޖަލު ހުކުމުގެ އަދަބު ގޭ ބަންދަށް ނުވަތަ ޖޫރިމަނާއަށް ނުވަތަ މުޖުތަމައުއަށް ހިދުމަތް ކުރުން ފަދަ އަދަބަކަށް ބަދަލު ކުރެވިދާނެ ކަމަށެވެ.

އަދި އަދަބުގެ ބާވަތް ބަދަލު ކުރާ ނަމަ، އެކަން ކުރެވޭނެ މުއްދަތުތަކާއި ޖޫރިމަނާގެ އަދަދުތައް ވެސް ގާނޫނުލް އުގޫބާތުގައި ހިމަނާފައި ވެއެވެ. ޕީޖީގެ މަގާމަށް ޝަމީމް ވަޑައިގަތުމުގެ ކުރިން ވެސް ޖަލުގައި "ވާނުވާ" ޖަހާފައި ތިބޭ ތިބުމަށް ހައްލު ގެނެސް ޖަލުގައި ގައިދީން ހޭދަ ކުރާ މުއްދަތާ ގުޅޭ ސައްހަ މަސައްކަތްތަކެއް ކުރައްވާނެ ކަމަށް އޭނާ ވަނީ ވިދާޅުވެފަ އެވެ.