މޫސަގެ މަރުގެ މައްސަލައިގެ ތުހުމަތު ކުރެވޭ ސައްމާހްގެ މައްސަލަ ސުޕްރީމް ކޯޓުގައި ހޯމަ ދުވަހު ބަލަން ފަށާ ބެންޗުގައި މިހާރު ހިމެނެނީ، ފަނޑިޔާރު ހުސްނުއްސުއޫދު، ފަނޑިޔާރު ޑރ. އަޒްމިރާލްދާ ޒާހިރު އަދި ފަނޑިޔާރު އައިޝާ ޝުޖޫން މުހައްމަދެވެ.
މި މައްސަލަ ކުރިން ދައުލަތުން ހުށަހެޅުމުން ބެލި ބެންޗަކީ ފަނޑިޔާރު އަލީ ރަޝީދު، ފަނޑިޔާރު މަހާޒް އަލީ ޒާހިރު އަދި ފަނޑިޔާރު ޑރ. މުހައްމަދު އިބްރާހީމް އެވެ.
ސުޕްރީމް ކޯޓުން އެންގުމުންވެސް ވ. ކެޔޮދޫ، މޫސަ މަރާލި ކަމަށް ތުހުމަތު ކުރެވޭ ސައްމާހު ބަންދު ކުރަން ހައިކޯޓުންވަނީ ދެކޮޅު ހަދާފައެވެ.
މީގެ ހަތް އަހަރު ކުރިން، މާފަންނު އައިޓަމްސް ފިހާރަ ކައިރީ މޫސާ އަހުމަދުގެ ގަޔަށް ވަޅި ހަރައި މަރާލި މައްސަލާގައި ދައުވާކޮށްފައިވާ އިބްރާހިމް ސައްމާހު އަހުމަދު ފަތުހީގެ މައްޗަށް ކުށް ސާބިތުނުވާ ކަމަށް ކްރިމިނަލް ކޯޓުން ކުރި ހުކުމުގެ އިސްތިއުނާފު ނިމެންދެން ބަންދު ނުކުރަން ހައިކޯޓުން ދެވަނަ ފަހަށް ނިންމިއިރު، އޭނާގެ ބަންދާ މެދު އަލުން ގޮތެއް ނިންމަން ހައިކޯޓުގެ މައްޗަށް ސުޕްރީމް ކޯޓުން އޮތީ ކުރިން އަމުރެއް ނެރެފައެވެ. އެހެން އެކަން އޮވެމެ، ހައިކޯޓުން ދެވަނަ ފަހަރަށްވެސް ނިންމީ އޭނާ ބަންދު ކުރާނެ ތަނެއް ނެތް ކަމަށެވެ.
ހައިކޯޓުން، ސައްމާހް ބަންދު ކުރަން ނުފެންނަ ދެވަނަ ފަހަރު ނިންމީ މައްސަލަ ބެއްލެވި ފަނޑިޔާރުންގެ ބެންޗުގެ އަގުލަބިއްޔަތުންނެވެ. އެއީ އެއީ ފަނޑިޔާރު މާނިއު އަދި ފަނޑިޔާރު ފައިސަލްގެ ރައުޔެވެ. މައްސަލައިގެ ރިޔާސަތު ބަލަހައްޓަވާ ފަރުހީޒާ ނިންމެވީ ސުޕްރީމް ކޯޓުގެ އަމުރާ އެއް ގޮތަށް ސައްމާހް ބަންދު ކުރާށެވެ. އެކަމަކު ކުރިން ތިން ފަނޑިޔާރުންވެސް ނިންމީ ސައްމާހް ބަންދު ނުކުރާށެވެ.
ސައްމާހް ކުރިން ހައިކޯޓުން ބަންދު ނުކުރުމުން، ސުޕްރީމް ކޯޓުން އެ މައްސަލަ ނިންމިއިރު ސައްމާހު ހަތް ދުވަހަށް ބަންދުކޮށް، ހައިކޯޓަށް އަމުރު ކުރީ، ހަތް ދުވަހުގެ ތެރޭގައި އޭނާގެ ބަންދާ މެދު އަލުން ގޮތެއް ނިންމުމަށެވެ. އެ މުއްދަތު ހަމަވީ ފަހުން ހައިކޯޓުގައި ދިގު އަޑު އެހުމެއް މި މައްސަލައިގައި ބޭއްވިއެވެ. ސައްމާހު އަހުމަދު ފަތުހީގެ ބަންދު މައްސަލައިގައި ސުޕްރީމް ކޯޓުގެ ވާނުވާ ނޭނގޭ އަމުރެއްގެ މައްސަލަ ކުރިން އޮތީ ފެންމަތިވެފައެވެ.
