ކޮރޯނާ ވައިރަހާއި ގުޅިގެން، މުޅި ދުނިޔޭގެ ހުރިހާ ކުޅިވަރު ހަރަކާތްތަކެއްހެން ހުއްޓުމަކަށް އައިސްފައިވާއިރު، ޓީޓުވެންޓީ ވޯލްޑްކަޕްގެ ޗީފް އެގްޒެކެޓިވް އޮފިސަރ ނިކް ހޮކްލޭ އުއްމީދުކުރައްވާ ގޮތުގައި އެ މުބާރާތުގެ ޝެޑިއުލްއަކަށް އެއްވެސް ބަދަލެއް ނާންނާނެއެވެ. އެހެންނަމަވެސް، ދިމާވެފައިވާ ސިއްހީ ނުރައްކާތެރި ހާލަތާއި ގުޅިގެން މުބާރާތުގެ ޝެޑިއުލަށް ބަދަލެއް ގެންނަން ޖެހިދާނެ ކަމަށް ތައްޔާރަށް ތިއްބެވި ކަމަށް ހޮކްލޭ ވިދާޅުވިއެވެ.
ޓީޓުވެންޓީ ވޯލްޑްކަޕްގެ ފުރަތަމަ މެޗުގައި ވާދަކުރާނީ މުބާރާތް ހޯސްޓްކުރާ އޮސްޓްރޭލިއާއާއި ޕާކިސްތާނެވެ. އޮސްޓްރޭލިޔާގެ ގައުމީ ކުޅިވަރަކީވެސް ކްރިކެޓް ކަމަށްވުމުން އެ ގައުމުން އަންނަނީ މުބާރާތަށް ފޮނި އުއްމީދުތަކެއް ކުރަމުންނެވެ.
ނުރައްކާތެރި ކޮރޯނާ ވައިރަހާއި ގުޅިގެން އޮސްޓްރޭލިއާގެ ބޯޑަރުތައްވެސް މިވަގުތުވަނީ ބަންދުކޮށްފައެވެ. އޮސްޓްރޭލިއާގައިވެސް ކޮރޯނާ ފެތުރިފައިވާއިރު މިހާތަނަށް އެ ބަލީގައި އޮސްޓްރޭލިއާއިން ތިރީސް ނުވަ މީހުން މަރުވެފައިވެއެވެ.
