ރަޖިސްޓްރީނުކޮށް ހިޖާމާ ޖެހުމުގެ ހިދުމަތް ދޭނަމަ ފިޔަވަޅު އަޅާނެކަަމުގެ އިންޒާރު ހެލްތު މިނިސްޓްރީން ވަނީ މީގެކުރިން ދީފައެވެ.
އެގޮތުން ހުއްދަނެތި ހިޖާމާ ޖެހުމުގެ މަސައްކަތް ކުރާތީ "ފަޒީސް ހިޖާމާ ތެރަޕީ" ސެންޓަރު ބަންދުކުރަން ހެލްތް މިނިސްޓްރީން މީގެ ކުރިން ވަނީ އެތަނަށް އަންގާފައެވެ. އެހެންނަމަވެސް އެތަން މިހާތަނަށްވެސް ބަންދުކޮށްފައި ނުވާތީ އެ މިނިސްޓްރީން ވަނީ މި މައްސަލަ ފުލުހުންނަށް ހުށައަޅާފައެވެ.
ދިވެހި ފުލުހުންގެ ހިދުމަތުން ބުނީ ހެކްތް މިނިސްޓްރީގެ ހުއްދަ ނުހޯފާ ހިޖާމާ ހިދުމަތް ހުޅުމާލޭގައި ދެމެދުންދާ ކުލިނިކެއްގެ މައްސަލަ ބަލާދިނުމަށް ހެލްތް މިނިސްޓްރީން އެދިފައިވާކަަމަށެވެ. އެހެންކަމުން އެ މައްސަލަ ތަހުގީގުކުރަމުން އަންނަކަމަށް އެ އިދާރާއިން ބުނެއެވެ. އެހެންނަމަވެސް އެއީ ކޮންތަނެއްކަމެއް ފުލުހުން ނުބުނެއެވެ.
ހަކުރު ބައްޔަށް ޖަހަމުން އަންނަ އިންސޫލިންގެ ބަދަލުގައި ހިޖާމާ ޖެހުމުން ހަކުރު ބަލިން ރަނގަޅުވާނެ ކަމަށް ބުނުމުން އެ މައްސަލަ ބޮޑުވެ ގިނަ ބަޔަކު ވަނީ ފަޒީ ހިޖާމާ ސެންޓަރުގެ ވެރިޔާ ފަޒީލާ އުސްމާނަށް ފާޑުކިޔާފައެވެ. އަދި މި މައްސަލާގައި ހެލްތު މިނިސްޓްރީން އެ ސެންޓަރުން ހިޖާމާ ޖެހުން 2022 ވަނަ އަހަރު ހުއްޓުވިއެވެ.
އެހެންނަމަވެސް ފަހުން އޭނާ ވަނީ އަލުން އެ މަސައްކަތް ފަށާފައެވެ. އޭނާ ބުނީ ފަހުން އެ މަސައްކަތް ކުރަމުން އަންނަނީ ހުއްދަ ނަގައިގެންކަމަށެވެ. އެހެންނަމަވެސް ހެލްތް މިނިސްޓްރީން ބުނީ ހިޖާމާ ޖެހުމަސް ފަޒީ ހިޖާމާ ތެރެޕީއަށް އެއްވެސް ހުއްދައެއް ދީފައި ނުވާނެކަމަށެވެ.
