މި މައުލޫމާތު ހާމަކުރެއްވީ ތެލެސީމިއާ މާސްޓާ ޕްލޭން އިފްތިތާހު ކުރުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ.
މިނިސްޓަރު ވިދާޅުވި ގޮތުގައި، ވޭތުވެދިޔަ 10 މަސް ދުވަހުގެ ތެރޭގައި ތެލެސީމިއާގެ ހާލަތު ރަނގަޅު ކުރުމަށް ސަރުކާރުން ވަނީ ގިނަ މަސައްކަތްތަކެއް ކޮށްފައެވެ. މީގެ ތެރޭގައި ތެލެސީމިއާ ކުދިން ސްކްރީން ކުރުމާއި، ސްކޫލް ކުދިން މި ބައްޔަށް ހޭލުންތެރި ކުރުވުމުގެ މަސައްކަތްތައް ހިމެނެއެވެ. އަދި 4 ތަނެއްގައި ބްލަޑް ބޭންކް ގާއިމުކޮށްފައިވާ ކަމަށްވެސް އޭނާ ވިދާޅުވިއެވެ.
މިއަހަރު ތެރޭގައި މެދުކެނޑިފައި އޮތް ބޯންމެރޯ ޓްރާންސްޕްލާންޓް ކުރުމުގެ ފުރުސަތު އަލުން ފަށައި، މިހާތަނަށް 14 ކުދިން ބޯންމެރޯ ޓްރާންސްޕްލާންޓް ހެދުމަށް ރާއްޖެއިން ބޭރަށް ފޮނުވާފައިވާ ކަމަށް މިނިސްޓަރު ވިދާޅުވިއެވެ. ސަރުކާރުގެ އަމާޒަކީ ކޮންމެ އަހަރަކު ވެސް ވަކި އަދަދަކަށް ކުދިން ބޯންމެރޯ ހަދަން ފޮނުވުމެވެ. މިވަގުތު ބޯންމެރޯ ހެދުމަށް ޝަރުތު ހަމަވާ 40 ކުދިން ލިސްޓު ކުރެވިފައިވާ ކަމަށް ހެލްތު މިނިސްޓްރީން ބުނެއެވެ.
ރައީސްގެ ވައުދާ އެއްގޮތަށް، ހުޅުމާލޭގައި ތަރައްގީ ކުރާ ތެލެސީމިއާ ހޮސްޕިޓަލުގައި ބޯންމެރޯ ހެދޭނެ އިންތިޒާމު ހަމަޖެހިފައި ހުންނާނެ ކަމަށް ހެލްތު މިނިސްޓްރީން ބުނެއެވެ. މިއީ ރާއްޖޭގައި ތިބެގެން މި ފަރުވާ ލިބޭނެ އިންތިޒާމު ހަމަޖެއްސުމަށް ސަރުކާރުން ކުރާ މަސައްކަތްތަކުގެ ތެރެއިން އެއް ކަމެކެވެ. މިހާރު ރާއްޖޭގައި 655 ތެލެސީމިއާ ބަލި މީހުންނާއި ކުދިން ތިބިކަން ފާހަގަކޮށްލެވެއެވެ.
