ފުލުހުން ކޯޓުގައި ބުނެފައިވަނީ މި މީހާ ހައްޔަރުކުރީ ސައިކަލެއް ވަގަށް ނަގައިގެން ދަނިކޮށް ކަމަށެވެ.
މި މައްސަލައިގައި އޭނާގެ ބަންދާ މެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން، ކޯޓުން ވަނީ 10 ދުވަހަށް އޭނާ ބަންދުގައި ބެހެއްޓުމަށް އަމުރުކޮށްފަ އެވެ. ކޯޓު އަމުރުގައި ބުނެފައިވަނީ އޭނާ ސައިކަލެއް ވަގަށް ނެގި ކަމަށް ތުހުމަތުކުރެވޭ މިންވަރަށް ހެކި ލިބިފައިވާ ކަމަށެވެ. މީގެ ތެރޭގައި ސީނަށް ދިޔަ ފުލުހުންގެ ރިޕޯޓާއި ވަގަށް ނަގާފައިވާ ސައިކަލު ހިމެނެ އެވެ.
ފުލުހުން ބުނާ ގޮތުގައި މި މީހާގެ 30 ހައްޔަރު ރެކޯޑު އޮންނަ އިރު، އޭގެ ތެރެއިން 16 ފަހަރު ބަންދުގެ މުއްދަތު ޖަހާފައިވެ އެވެ. އަދި ސައިކަލު ވަގަށް ނެގުމުގެ ރެކޯޑުވެސް އޭނާގެ އެބަހުއްޓެވެ.
ކޯޓު އަމުރުގައި ބުނެފައިވަނީ ގާނޫނުއަސާސީގެ 49 ވަނަ މާއްދާއާއި، ޖިނާއީ އިޖުރާތުގެ 59 ވަނަ މާއްދާއާއި، 60 ވަނަ މާއްދާއާއި މުޖުތަމައުގެ ސަލާމަތަށް ރިއާޔަތްކޮށް އޭނާ ބަންދުކުރުމަށް ނިންމި ކަމަށެވެ.
