ޝަހުމްގެ މައްޗަށް މަރަށް މަރު ހިފަން ކްރިމިނަލްކޯޓުން ހުކުމް ކުރީ ތޫނު އެއްޗަކުން ހަމަލާދީ ސ. ހިތަދޫ ވަރުދީގޭ، އަހުސަން ބަޝީރު މަރާލި މައްސަލާގައެވެ. އޭނާ މަރާލާފައިވަނީ 16 މާޗު 2011ގައި މެންދަމުގެ ވަގުތެއްގައި އޭނާ އަލިކިލޭގެފާނު މަގާއި މަޖީދީމަގާ ގުޅުނު ކަންމަތީގައި ހުއްޓައެވެ.
އަހުސަން ބަޝީރު މަރާލި މައްސަލާގައި، ކުށް ސާބިތުވެ މަރަށް މަރު ހިފުމަށް ޝަހުމްގެ މައްޗަށް ކްރިމިނަލްކޯޓުން ކުރި ހުކުމް ހައިކޯޓުން ދެމެހެއްޓީ 2021 ވަނަ އަހަރުއެވެ.
ހައިކޯޓުން ކުރި ހުކުމް ނިހާއީ ހުކުމެއްކަމަށްް ކަނޑައަޅަން ދައުލަތުން އެ މައްސަލަ އެންމެ މަތީ ކޯޓް ސުޕްރީމްކޯޓަށް ހުށައެޅީ ޝަހުމް އެ މައްސަލަ އިސްތިއުނާފު ނުކުރުމުންނެވެ. ދައުލަތުން ސުޕްރީމް ކޯޓަށް އެ މައްސަލަ ވެއްދީ 2022 ވަނަ އަހަރުއެވެ.
މި މައްސަލައިގެ އަޑުއެހުންތައް ފަށަން ސްޕްރީމްކޯޓުން މީވަނީ ދެ އަހަރު ފަހުން ތާވަލުކޮށްފައެވެ. އެ ކޯޓުން ވަނީ މި މައްސަލަގެ ފުރަތަމަ އަޑުއެހހުން އަންނަ މަހު ހަތަރު ވަނަ ދުވަހު ހެނދުނު 10 ޖަހާއިރު ބާއްވަން ނިންމާފައެވެ. އަދަި މައްސަލަ ބައްލަވާ ފަނޑިޔާރުންގެ ބެންޗުވެސް ވަނީ އިއުލާންކޮށްފައެވެ.
މައްސަލަ ބައްލަވާ ފަނޑިޔާރުންގެ ބެންޗު
- ޑރ. މުހައްމަދު އިބްރާހީމް
- ޑރ. އަޒްމިރާލްދާ ޒާހިރު
- އާއިޝާ ޝުޖޫން މުހައްމަދު
- ހުސްނުއްސުއޫދު
- އަލީ ރަޝީދު ހުސައިން
އަހަސުނުގެ މަރުގެ މައްސަލާގައި ޝަހުމްގެ އިތުރުން މއ. ވީނަސްތަރި ހަސަން ޝިމާޒް މުހައްމަދު ސުވާދުގެ މައްޗަށްވެސް ކުށް ސާބިތުނުވާ ކަމަށް ކަނޑައެޅިއެވެ. ޝިމާޒްގެ މައްޗަށް ކުރީ ފަނަރަ އަހަރުގެ ޖަލު ހުކުމެކެވެ. އޭނާގެ މައްޗަށް ކުރީ ގަސްދުގައި މީހަކު މެރުމުގައި ބައިވެރިވުމުގެ ދައުވާ އެވެ
އަހުސަން މަރާލި މި މައްސަލައަކީ މަރުގެ ތުންފަތް މަތީގައި އޮވެގެން މީހަކު ބުނި ބަސް ނުވަތަ ޑައިން ޑިކްލަރޭޝަން ރާއްޖޭގެ ކޯޓަކުން ފުރަތަމަ ފަހަރަށް ބަލައިގަތް މައްސަލައެވެ. އަހުސަނަށް ހަމަލާދިނީ ޝަހުމާއި ޝިމާޒް ކަމަށް ހޮސްޕިޓަލްގައި އޮވެގެން ބައެއް މީހުންގެ ގާތުގައި އޭނާ ބުނެފައިވެ އެވެ.
ޝަހުމްގެ މައްޗަށް މަރަން ހުކުމް ކުރީ މަރުގެ އެހެން މައްސަލައެއްގައި އުމުރު ދުވަހުގެ ޖަލު ހުކުމެއް ތަންފީޒު ކުރަމުން ދަނިކޮށެވެ.
