އައިޖީއެމްއެޗުގައި މަސައްކަތްކުރި މޭރީ އޮކްޓޫބަރު 2021 ގައި މަރާލި މައްސަލާގައި ދައުލަތުން ދައުވާކުރަނީ އޭނާގެ ފިރިމީހާ މާވިން އެސްވައި އާއި ލަމްހާ ލޯބީގެ ގޮތުން ގުޅިގެން އުޅެމުން އެ ދެ މީހުން ބައިވެރިވެގެން މޭރީ މަރާލި ކަމަށް ބުނެ އެވެ. މާވިންގެ މައްޗަށް ކުރަނީ އެނގި ހުރެ މީހަކު މެރުމުގެ ދައުވާ އެވެ.
މޭރީ މަރުވީ ދަން ޖެހިގެން ކަމަށް އޭނާގެ ފިރިމީހާ މާވިން ރިޕޯޓުކުރި ނަމަވެސް ޕޯސްޓްމޯޓަމް ރިޕޯޓުން ދެއްކީ އޭނާ މަރުވީ ބޮލަށާއި ކަރަށް ހަމަލާދީ، އޭނާގެ ނޭވާ ހާސްކޮށްލައިގެން ކަމަށެވެ.
މި މައްސަލާގައި މިއަދު ބޭއްވި އަޑުއެހުމުގައި ވަނީ މޭރީގެ މަރުވެފައި އޮތް ހަށިގަނޑު ބެލި ޑޮކްޓަރު ހެކިބަސް ދީފައެވެ. އެ ޑޮކްޓަރަކީ އެންމެ ފުރަތަމަ މޭރީގެ ހަށިގަނޑު އެގްޒަމިންކުރި ޑޮކްޓަރެވެ. އަދި އޭނާ ވަނީ މޭރީގެ ހަށިގަނޑު އިންޑިއާއަށް ގެންގޮސް ޕޯސްޓްމޯޓަމް ކުރިއަށް ގެންދިޔައިރު އެ މަސައްކަތުގައިވެސް ބައިވެރިވެފައެވެ.
ހެކިބަސް ދެމުން ޑޮކްޓަރު ބުނީ މޭރީގެ ހަށިގަނޑު ފުރަތަމަ ގެންދސް ބެލިއިރުވެސް ދަންޖެހޭ މީހެއްގެ ކަރުގައި ހުންނަ ޒާތުގެ ނިޝާނެއް ފެންނަން ނެތްކަމަށެވެ. އަދި މޭރީ ނޭވާ ހާސްކޮށްލަން އުޅެފައިވާ ކަމަށް ބެލެވޭ ނިޝާންތައް ފެންނަން ހުރިކަމަށްވެސް ޑޮކްޓަރު ބުނިއެވެ.
އެގޮތުން ތިރީ ތުންފަތާއި މަތީ ތުންފަތުގައި ކަނޑައިގެން ގޮސްފައިވާ ތަންތަން ހުރިކަމަށާއި އަނގަމަތީގައި އެއްޗެއް އެޅީމައި ފިތިގެންދާ ގޮތަށް ހުރި ނިޝާންތަކެއް ފެނުނުކަމަށް ޑޮކްޓަރުން ބުނިއެވެ. އަދި އެ ނިޝާންތަކަކީ ނޭވާ ހާސްކޮށްލަން އުޅެފައިވާ ކަމަށް ބާރު ދެވޭ ހެކިތަކެއްކަންވެސް ޑޮކްޓަރު ފާހަގަކުރުއެވެ.
