މި އިއްޒަތް އެރުވުމަށް ހަމަޖެހިފައިވަނީ މި އަހަރުގެ ނަސްރުގެ ދުވަހުގެ މުނާސަބަތުގައި ބޭއްވޭ ރަސްމީ ޖަލްސާގައެވެ.
މި އިއްޒަތް އެރުވުމަށް ނިންމެވީ ދިވެހި ގައުމާއި ރައްޔިތުންގެ ސަލާމަތަށް އަސްކަރީ ގޮތުން މޫސާ އަލީ ޖަލީލް ކުރެއްވި އަގުހުރި ހިދުމަތްތަކަށް ބައްލަވައިގެންނެވެ. ހާއްސަކޮށް 1988 ނޮވެމްބަރު 3 ގައި ރާއްޖެއަށް ކުރިމަތިވި ނުރައްކާތެރި އުދުވާނީ ހަމަލާއާ ގުޅިގެން ދިވެހި ގައުމާއި ރައްޔިތުންގެ ދިފާއުގައި ކުރެއްވި މަތިވެރި ޖިހާދުގެ އަގު ވަޒަންކުރެއްވުމުގެ ގޮތުންނެވެ.
މޫސާ އަލީ ޖަލީލަކީ ކުރީގެ ރައީސް ނަޝީދުގެ ވެރިކަމުގައި ޗީފް އޮފް ޑިފެންސް ފޯސްގެ މަގާމު އަދާކުރައްވާފައިވާ ބޭފުޅެކެވެ. އަދި ރައީސް ޔާމީންގެ ވެރިކަމުގައި ޑިފެންސް މިނިސްޓަރުގެ މަގާމުވެސް އަދާކުރައްވާފައިވެއެވެ.
މި އިއްޒަތް އެރުވުމަށް ހަމަޖެހިފައިވާ ރަސްމިއްޔާތު އޮންނާނީ މާދަމާ ރޭ 8:30 ގައި ދަރުބާރުގޭގައެވެ. މި އިއްޒަތް ދެއްވުމަށް ރައީސް މުއިއްޒު ނިންމެވީ ގާނޫނުއަސާސީގެ 115 ވަނަ މާއްދާއިންނާއި، ގާނޫނު ނަންބަރު 97/1 (ދިވެހިރާއްޖޭގެ އިއްޒަތުގެ ގާނޫނު)ގެ ދަށުން ރައީސުލްޖުމްހޫރިއްޔާއަށް ލިބިވަޑައިގަންނަވާ އިހުތިޔާރުގެ ދަށުންނެވެ.
