އެމްއެމްއޭގެ އެސިސްޓެންޓް އެގްޒެކެޓިވް ޑިރެކްޓަރު އައިޝަތު އަސްނާ ދައުލަތުގެ މީޑިއާގެ "ރާއްޖެ މިއަދު" ޕްރޮގްރާމުގައި ގައި ވިދާޅުވި ގޮތުގައި މިހާރު 200 އަށް ވުރެ ގިނަ ފަރާތްތަކަށް ބޭރު ފައިސާ މާރުކުރުމުގެ ހުއްދަ ދީފައިވާ ކަމަށާއި، އާ ގަވާއިދުގެ ދަށުން ބޭރު ފައިސާ މާރުކުރެވޭނީ ވަކި ސަރަހައްދުތަކެއްގައި ކަމަށެވެ.
އާ ގަވާއިދުގެ ދަށުން ބޭރު ފައިސާ މާރުކުރުމުގެ ހުއްދައަށް އެދޭ ފަރާތްތަކުން 50،000 އެމެރިކާ ޑޮލަރުގެ ޑިޕޮސިޓެއް ބަހައްޓަންޖެހޭނެ ކަމަށް އެމްއެމްއޭ އިން ބުނެއެވެ. އަދި ހުއްދަ ދެ ބަޔަކަށް ބަހާލެވިފައިވާ ކަމަށާއި، އެއީ ބޭރު ފައިސާ ގަނެވިއްކުމުގެ ހުއްދައާއި ހަމައެކަނި ވިއްކުމުގެ ހުއްދަ ކަމަށް އެމްއެމްއޭ އިން މައުލޫމާތު ދީފައިވެ އެވެ. ނަމަވެސް ޓޫރިޒަމް ދާއިރާގެ ތަންތަނަށް މި ގަވާއިދު ނުހިނގާނެ ކަމަށް ވެސް އެމްއެމްއޭ އިން ބުނެ އެވެ.
މިހާރު ބޭރު ފައިސާ މާރުކުރުމުގެ ހުއްދަ އޮތް ހުރިހާ ފަރާތްތަކުން މި މަހުގެ ނިޔަލަށް އަލުން ހުއްދައަށް އެދެންޖެހޭނެ ކަމަށް އެމްއެމްއޭ އިން ބުނެއެވެ. މިއީ 1987 ވަނަ އަހަރުން ފެށިގެން އަމަލުކުރަމުން އައި ގަވާއިދުތަކަށް ގެނެވުނު ބޮޑު ބަދަލެއް ކަމަށާއި، މި ބަދަލުތަކުގެ ސަބަބުން ރާއްޖޭގެ ބޭރު ފައިސާ މާރުކުރުމުގެ ދާއިރާ އިތުރަށް ހަރުދަނާވެގެންދާނެ ކަމަށް އެމްއެމްއޭ އިން ބުނެއެވެ.
ނޯޓު: މި ހަބަރުގައި އެމްއެމްއެމްއޭއިން ކުންފުންޏެއް އުފައްދާކަމަށް ކުރިން ބުނެފައިވަނީ މައުލޫމާތުގެ ކުށަކުންނެވެ. މި ހަބަރު ވަނީ 3 ނޮވެންބަރު 2024 ވަނަ ދުވަހު 14:59 ގައި އަޕްޓޭޓުކުރެވިފައެވެ.
