ރައީސް ޑރ. މުއިއްޒު މިހެން ވިދާޅުވީ މީޑިއާ ކޮމިޝަން އެކުލަވާލުމަށް މަޖިލިހަށް ބިލެއް ވެއްދުމާއި ގުޅިގެން އެކަމާއި ފާޑިކިތުންތައް ސަރުކާރަށް އަމާޒުވެފައި ވަނިކޮށެވެ.
މީޑިއާ ރެގިއުލޭޓްކުރަން މިހާރު އޮންނަ މޯލްޑިވްސް މީޑިއާ ކައުންސިލާއި މޯލްޑިވްސް ބްރޯޑްކާސްޓިން ކޮމިޝަން އުވާލާ އެއްކޮށްލަން 'މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަންގެ ބިލު'ގެ ނަމުގައި މަޖިލިހަށް ބިލެއް ހުށައެޅުއްވީ ތުޅާދޫ ދާއިރާގެ މެންބަރު އަބްދުﷲ ހަންނާން އަބޫބަކުރުއެވެ.
މި ބިލަކީ ސަރުކާރުން އަޑީގައި އޮވެގެން ހުށައަޅާފައިވާ ބިލެއްކަމަށް އިދިކޮޅު އެމްޑީޕީން ބުނަމުން އަންނައިރު ނޫސްވެރިންވެސް ވަނީ މި ބިލާއި މެދު ކަންބޮޑުވުން ފާޅުކޮށްފައެވެ.
މިކަމާއި ގުޅިގެން ރައީސް ޑރ. މުއިއްޒު އެކްސްގައި ކުރެއްވި ޕޯސްޓެއްގައި ވިދާޅުވީ ނޫސްތަކާއި މީޑިއާތައް ކޮންޓްރޯލް ކުރުމަކީ އެމަނިކުފާނު ޤަބޫލުކުރާ ހަމަޔެއްނޫންކަމަށެވެ. އަދި ގާނޫނު އަސާސީއާއި ހިލާފުނުވާ ކޮންމެ ކަމެއް ކުރެވޭނެކަމަށްވެސް ރައީސް ޑރ. މުއިއްޒު ވިދާޅުވިއެވެ.
7 މެމްބަރުންގެ މައްޗަށް އެކުލެވޭ ކޮމިޝަންގެ މެޖޯރިޓީ ސަރުކާރަށް ދޭ ގޮތަށް އެކުލަވާލި ބިލުގައިވަނީ ނޫސްވެރިން ބޮޑެތި އަދަދު ޖޫރިމަނާކުރުމާއި ލައިސަންސް ބާތިލުކުރަން ކޯޓަށް ދިއުމުގެ ބާރު އެ ކޮމިޝަނަށް ދީފައެވެ.
