ހުޅުމާލެ ސަހަރާ މިސްކިތުގައި ހިނގި މި ހާދިސާއާއި ގުޅިގެން ހައްޔަރުކޮށްފައިވަނީ އދ. ދަނގެތި، ލިލީގޭ އުމުރުން 33 އަަހަރުގެ ހުސެއިން ފާއިގްއެވެ.
ހުޅުމާލެ ސަހަރާ މިސްކިތައް ރޭ އިރުއޮއްސޭ ނަމާދަށް ދިޔަ މީހަކު "ސީއެންއެމް" އަށް ބުނީ އެމީހާ ފުރަތަމަ މަސައްކަތް ކުރީ މިސްކިތުގެ އިމާމަށް ހަމަލާ ދޭން ކަމަށާއި ނަމަވެސް އެކަން ކާމިޔާބު ނުވެ، އެ ސަރަހައްދުން ދާން މަސައްކަތް ކުރުމުން ފުލުހުން އޭނާ ހުއްޓުވަން މަސައްކަތްކުރިކަމަށެވެ. އަދި އޭނާ ހުއްޓުވަން މަސައްކަތްކުރި ފުލުސް މީހާއަށްވެސް ވަޅިން ބިރު ދެއްކި ކަމަށް އެމީހާ ބުންޏެވެ.
ދިވެހި ފުލުހުންގެ ހިދުމަތުން ބުނީ ތޫނު އެއްޗެއް ބޭނުން ކޮށްގެން މީހަކަށް ހަމަލާ ދޭން އުޅުނު ކަމުގެ ތުހުމަތުގައި މި މީހާ ހައްޔަރުކުރީ ރޭ 18:30 ހާއިރު ކަމަށެވެ. އަދި އެވަގުތު އެ މީހާ ހުއްޓުވަން އުޅުނު ފުލުހަކަށްވެސް ތޫނު އެއްޗެއް ބޭނުންކޮށްގެން ހަމަލާ ދޭން މަސައްކަތް ކޮށްފައިވާ ކަމަށް ފުލުހުންވެސް ވަނީ ބުނެފައެވެ.
ފުލުހުން އެމީހާ ހަައްޔަރު ކުރި މަންޒަރު ފެންނަ ވީޑިއޯ ވަނީ އާންމުވެފައެވެ. އެމީހާ ހައްޔަރު ކުރުމުން އެމީހާ ބުނަމުން ދިޔައީ އޭނާ އަކީ ނަފްސާނީ ބަލި މީހެއް ކަމަށެވެ.
މި މައްސަލަ ފުލުހުން އަންނަނީ އިތުރަށް ތަހުގީގު ކުރަމުންނެވެ.
