ޕީއެންސީން ބުނީ މި އިންތިހާބުގައި 2095 މަގާމަކަށް މެންބަރުން ހޮވާ ކަމަށެވެ. އެހެން ނަމަވެސް ބައެއް ދާއިރާތަކަށް ވަނީ އިންތިޚާބަކާ ނުލައި މެންބަރުން ހޮވިފައެވެ. އެ ޕާޓީގެ މެންބަރުންގެ ދަފްތަރުގައި 75,000 އަށް ވުރެ ގިނަ މެންބަރުން ތިބި އިރު، ވޯޓު ލުމުގެ ހައްގު ލިބިފައިވަނީ 34,000 އަށް ވުރެ ގިނަ މެންބަރުންނަށެވެ.
އިންތިޚާބުގައި ހޮވަނީ ދާއިރާތަކުގެ ރައީސުންނާއި ނައިބު ރައީސުންގެ އިތުރުން ރަށްރަށުގެ ޒުވާނުންގެ ހަރަކާތުގެ ރައީސުންނާއި އަންހެނުންގެ ހަރަކާތުގެ ރައީސުންނާއި ސްޓިއަރިން ކޮމިޓީތަކުގެ މެންބަރުންނެވެ. ޕީއެންސީގެ މަޖިލިސް މެންބަރުން ތިބި ދާއިރާތަކުގެ ރައީސުންގެ ގޮތުގައި ތިބޭނީ އެ މެންބަރުންނެވެ.
ޕީއެންސީން ބުނީ ކޮންމެ ރަށެއްގައި ވެސް ސްޓިއަރިން ކޮމިޓީއެއް އެކުލަވާލާނެ ކަމަށެވެ. އާބާދީ 3,000 އަށް ވުރެ ކުޑަ ރަށްރަށުގައި ހަތް މެންބަރުންގެ ކޮމިޓީއެއް އެކުލަވާލާ އިރު، އާބާދީ އެއަށް ވުރެ ބޮޑު ރަށްރަށުގައި ނުވަ މެންބަރުންގެ ކޮމިޓީއެއް އެކުލަވާލާނެ އެވެ. އިންތިޚާބުގެ ނަތީޖާ މިރޭގެ ވަގުތެއްގައި އިއުލާންކުރާނެ ކަމަށް އެ ޕާޓީން ބުނެފައިވެ އެވެ.
- ވޯޓުލުން ފެށީ ހެނދުނު 10:00 ގައި، ނިމުނީ 14:00 ގައި
- 2095 މަގާމަކަށް މެންބަރުން ހޮވާނެ
- ޕާޓީގައި 75,000 އަށް ވުރެ ގިނަ މެންބަރުން ތިބޭއިރު ވޯޓުލެވޭނީ 34,000 އަށް ވުރެ ގިނަ މެންބަރުންނަށް
- ރަށްރަށުގެ އާބާދީއަށް ބަލައި ސްޓިއަރިން ކޮމިޓީތަކުގައި 7 ނުވަތަ 9 މެންބަރުން ތިބޭނެ
- އިންތިހާބުގެ ނަތީޖާ މިރޭ އިއުލާންކުރާނެ
