ދިވެހި ލީގު ކާމިޔާބުކޮށް އޭއެފްސީ ކަޕުގައިވެސް ކުޅެފައިވާ ހުރާ، އެނބުރި ގަލޮޅު ދަނޑަށް އައީ މިހާރު ހިނގަމުންދާ ގޯލްޑްކަޕްގައެވެ. ގޯލްޑްކަޕުގައި ހުރާ ކުޅުނު ފުރަތަމަ މެޗުގައިވަނީ ގުރައިދޫ އަތުން ތިން ލަނޑު އެއް ލަނޑުން ބަލިވެފައެވެ.
މިއީ، 36 އަހަރުގެ ތެރޭގައި ހުރާ އަތުން ގުރައިދޫ މޮޅުވީ ފުރަތަމަ ފަހަރެވެ.
ގުރައިދޫއަށް އެންމެ ފަހުން ހުރާ ކައިރިން މޮޅުވެވިފައިވަނީ މީގެ 36 އަހަރު ކުރިން، 1988 ވަނަ އަހަރުއެވެ. އޭރު އެއީ، ރާއްޖެ ތެރޭ ފުޓްބޯޅަ މުބާރާތުގެ ނަމުގައި ކުޅުނު މުބާރާތެކެވެ. އެ ފަހަރު ހުރާ އަތުން ގުރައިދޫ މޮޅުވީ އަމިއްލަ ރަށުގައި ކުޅެ ދެ ލަނޑު އެއް ލަނޑުންނެވެ.
ހުރާ އަދި ގުރައިދޫއަކީވެސް ކުރިން އެއްވަނަ ޑިވިޝަނުގައި ގިނަ ދުވަސްތަކެއް ވަންދެން ކުޅުނު ދެ ރަށެވެ. އެކަމަކު ހުރާވަނީ ރާއްޖޭގެ ޗެމްޕިއަންކަން ހޯދައި ފުޓްބޯޅައިގައި ރަން އަކުރުން އެ ޓީމުގެ ތާރީޚު ލިޔެފައެވެ. ވިކްޓްރީ، ނިއުރޭޑިއަންޓް އަދި ވެލެންސިޔާގެ އެންމެ ފޯރިގަދަ ދުވަސްވަރު، ހުރާ ވެފައިވަނީ އެ ޓީމުތަކަށް ވަރުގަދަ ޗެލެންޖެެއް ދިން ބަޔަކަށެވެ.
