ޕަބްލިކް ބެންކް އެކައުންޓް އޯވަޑްރޯކުރުމަށް މިނިސްޓަރު އިބްރާހިމް އަމީރު މަޖިލީހަށް ހުށައަޅާފައިވާ ސިޓީއަށް ބަހުސްކުރަމުން ހަސަން ލަތީފު ވިދާޅުވީ ސަރުކާރުން ނަގާ ދަރަނި ފައިސާގެ މައުލޫމާތާއި އެ ހަރަދުކުރާނެ ގޮތް މަޖިލީހަށް އެނގޭނެހެން މޮނިޓަރިން މެކޭނިޒަމެެއް އޮތުން މުހިންމުކަމަށެވެ. އަދި ބަޔަކު ކުރާ ނުރަނގަޅު ކަމެއްގެ އިލްޒާމް ރައީސް އިބްރާހިމް މުހައްމަދު ސޯލިހުގެ އިސްތަށިފުޅުގައި އެޅެން ބޭނުންނުވާކަމަށެވެ.
އިއްޔެ ފިނޭންސް މިނިސްޓަރު ނޫސްވެރިންނާއި ބައްދަލުކޮށް "ރާއްޖޭގެ އިގްތިސޯދު މިހާރު ވަނީ ވެންޓިލޭޓަރު ބޭނުންވެފައި" ކަމަށް ވިދާޅުވުމުން އެ ވާހަކައަށް އިޝާރާތްކުރައްވާ ހަސަން ލަތީފު ވިދާޅުވީ ސަރުކާރުން އަދި މިހާތަނަށް އެކަމުގެ ތަފްސީލް ބުނެދީފައި ނެތުމަކީ އެކަމާ ހިތާމަ ކުރާ ކަމެއް ކަމަށެވެ. އަދި އިގްތިސޯދު ވެންޓިލޭޓަރުން ނެގުމަށް ފިޔަވަޅުތަކެއް އަޅަންޖެހޭކަމަށް ލަތީފްގެ ވާހަކައިގައި ވަނީ ފާހަގަކޮށްފައި އެވެ.
މީގެ އިތުރުން އޭނާ ވިދާޅުވީ އިއްޔެ ޕްރެސް ކޮންރެންސްގައި ފިނޭންސް މިނިސްޓަރު ތަފްސީލްކޮށްދެއްވި ހަރަދުތަކުގެ ތަފްސީލަކީ އަދަދަކީ 1.49 ބިލިއަން ރުފިޔާ ކަމަށެވެ. އަދި މަޖިލީހުގައި އެދިފައިވާ ބަޖެޓަކީ 4.2 ބިލިއަން ރުފިޔާ ކަމަށްވާއިރު ބާކީ ރުފިޔާގެ ތަފްސީލް އެނގެން ބޭނުންވާ ކަމަށެވެ.
އަދި ރޯގާއިން ރައްކާތެރިވުމަށް އަޅާނެ ފިޔަވަޅުތަކާ ގުޅިގެން ހަރަދުތަކުގެ ތަފްސީލް ވެސް ބޭނުންވާ ކަމަށް ހަސަން ލަތީފް ވިދާޅުވި އެވެ.