ޓީވީ ޗެނަލެއްގައި ވާހަކަ ދައްކަމުން އަބްދުރަހީމް ވިދާޅުވީ ރޯދަމަހަކީ އިހުސާންތެރިވެ އަޅާލުމުގެ މަސްވަރުކަމަށް މި މަހުގެ ތަހުނިޔާ ކިޔުއްވަން ގައުމާ މުހާތަބުކުރައްވާ ރައީސް އިބްރާހިމް މުހައްމަދު ސޯލިހު ދެއްވި ހިތޯބުގައި ވެސް ފާހަގަކުރެއްވި ކަމަށެވެ.
އެކަމަކު ކުރީގެ ރައީސް އަބްދުﷲ ޔާމިން އަބްދުލްގައްޔޫމްގެ މައްސަލައިގައި އިހުސާންތެރިވާތަން ފެނިގެންނުދާ ކަމަށާއި އެެހެންކަމުން މި މާތް މައްސަރުގައި ވެސް އިހުސާންތެރިވެ އޯގާތެރިވުމަށް ގޮވާލާ ކަމަށެވެ.
އޭނާ ވިދާޅުވީ ޖަލު ހުކުމުގައި ހުންނަ ބޭފުޅަކު ރޯދަ މަހު ގެއަށް ބަދަލުކުރުމަކީ ނުކުރެވޭވަރުގެ ކަމެއް ނޫންކަމަށާއި އެކަން އެ ބޭފުޅުންގެ ސަރުކާރުގައި ކޮށްދެއްވާފައިވާނެ ކަމަށެވެ.
އަދި ކޮވިޑް-19 އާ ގުޅިގެން ޖަލުތަކުގައި ސިޔާސީ ހުކުމް ތަންފީޒުކުރާ ފަރާތްތަކަށް ލުއި ދިނުމަށް އދ. ގެ އިންސާނީ ހައްގުތަކަށް މަސައްކަތްކުރާ ޖަމިއްޔާއިން ގޮވާލާފައިވާއިރު އެމަނިކުފާނަކީ އިދިކޮޅުގައި ހުރި ހަމައެކަނި ސިޔާސީ ލީޑަރުކަމަށެވެ.
ކޮވިޑް-19 ގެ ރިސްކް ބޮޑު ފަރާތްތަކަށް ލުއި ދިނުމަށް ވެސް އެޖަމިއްޔާއިން ގޮވާލާކަން ފާހަގަކުރައްވަމުން އަބްދުއްރަހީމް ވިދާޅުވީ ޔާމީނަކީ އުމުރުން 60 އަހަރުން މަތީގެ ބޭފުޅެއްކަމަށާއި ހިތުގެ ބައްޔަށް ފަރުވާ ހޯދަމުންދާ ބޭފުޅެއް ކަމަށެވެ.