ގައުމީ ޓީމްތަކުގެ ކުޅުންތެރިންނަށް މުސާރަ ނުދެނީ ޕްރެކްޓިސް ނުކުރާ ދުވަސްވަރެއްކަމުގައިވާތީ ކަމަށް ވިދާޅުވެ، މިނިސްޓަރ މަހްލޫފު ދެއްކެވި ވާހަކަފުޅަށް ރައްދު ދެމުން ސޮބާ ބުނީ، ޕްރެކްޓިސް ނުކުރާތީ މުސާރަ ނުދިނުން އެންމެ ރަނގަޅު ނަމަވެސް، ގައުމީ ޓީމަށް ކުޅޭ ކުޅުންތެރިންނަށް ކޮންމެވެސް ކަހަލަ އެލަވަންސެއް ދޭން ޖެހޭ ކަމަށް ދެކޭ ކަމަށެވެ. އަދި ބައެއް ކުޅުންތެރިންނަކީ، އިތުރު އެހެން މަސައްކަތެއް ނުކޮށް ހުސްއެކަނި ކުޅިވަރުން ލިބޭ އާމްދަނީއަކުން ދިރިއުޅޭ ބައެއް ކަމަށާއި، މި ކަހަލަ ދަނޑިވަޅެއްގައި އެ ކުޅުންތެރިންނަށް އެއްޗެއް ދެވެން ނެތް ކަމަށް ވިދާޅުވުމަކީ އެ ކުޅުންތެރިންނަށް ދެވޭ ނޭދެވޭ މެސެޖެއް ކަމަށެވެ.
ރާއްޖޭގައި އެންމެ މަތީ ފެންވަރުގައި ކުޅެ، ރާއްޖޭގައި އުފެދުނު އެންމެ މޮޅު ޑިފެންޑަރުންގެ ތެރޭގައި ހިމެނި، އަދި ކުޅުން ހުއްޓާލުމަށް ފަހު ކޯޗިންގެ ދާއިރާގައި ހަރަކާތްތެރިވަމުން އަންނަ ޒުވާން ކޯޗު ސޮބާ އިތުރަށް ބުނީ ކުޅުންތެރިންގެ އިހްސާސްތަކާއި ކުޅުންތެރިންގެ ދިރިއުޅުން ގިން ފަރާތްތަކަށް ނުވިސްނޭ ކަމަށެވެ. އަދި މިނިސްޓަރުގެ ވާހަކައިން ހާމަވެގެން ދިޔައީ ރާއްޖޭގައި ކުޅުންތެރިންގެ އަގު ވަޒަން ނުކުރާ މިންވަރުކަމަށް ސޮބާ ބުންޏެވެ.
މިނިސްޓަރ މަހްލޫފު، ނޫސްވެރިންނާ ބައްދަލުކޮށް ވިދާޅުވީ، ގައުމީ ޓީމަށް އެލަވެންސް ނުލިބިގެން އުޅެނީ ފަރިތަކުރުންތައް ކުރިއަށް ނުގެންދާތީ ކަމަށެވެ. އެކަމާއި ގުޅިގެން ގިނަ އެތްލީޓުން އަންނަނީ ޚިޔާލުފާޅުކުރަމުންނެވެ.