ރައީސް، ރަސްމާލެ ހިއްކުމުގެ މަޝްރޫއު ކުރިއަށްދާގޮތް ބައްލަވާލެއްވުން
2025-11-12 22:16:01
ކ. ފުށިދިއްގަރުފަޅުގައި "ރަސްމާލެ" ނަމުގައި ތަރައްގީކުރާ ރަށަށް ބޭނުންވާ ބިން ހިއްކާ ސަރަހައްދަށް ރައީސް މުހައްމަދު މުއިއްޒު މިއަދު ޒިޔާރަތްކުރައްވައި މަސައްކަތް ހިނގަމުންދާ ގޮތް ބައްލަވާލައްވައިފި އެވެ. ރައީސް މުއިއްޒު އާއި ހައުސިން މިނިސްޓަރު ޑރ. އަބްދުﷲ މުއްތޮލިބްގެ އިތުރުން ސަރުކާރުގެ ބައެއް އެހެން އިސް ބޭފުޅުންނާއި ރައްޔިތުންގެ މަޖިލީހުގެ މާލޭ ދާއިރާތަކުގެ ބައެއް މެންބަރުންނާ އެކު މިއަދު ހަވީރު އެ ތަނަށް ވަޑައިގަތީ ކ. ގުޅިއަށް އެ މަނިކުފާނު ކުރެއްވި ދަތުރުފުޅު ނިންމަވާލައްވައި މާލެ ވަޑައިގެންނެވި މަގުމަތީގަ އެވެ. ރައީސް މުއިއްޒު އެ ސަރަހައްދަށް ވަޑައިގެންނެވި މަންޒަރާ އެކު ރައީސް އޮފީހުން ޝާއިއުކުރި ހަބަރުގައިވާ ގޮތުން، މިހާތަނަށް އެ ފަޅުގެ ތިން ސަރަހައްދެއްގައި ބިން ހިއްކުމުގެ މަސައްކަތް ދަނީ ކުރަމުންނެވެ.
