ރައީސް ޑރ. މުހައްމަދު މުއިއްޒު ރިޔާސީ ބަޔާން އިއްވުން
2026-02-05 16:19:17
ގާނޫނު އަސާސީގެ 84 ވަނަ މާއްދާގައިވާ ގޮތުގެ މަތިން، ރައީސް ޑރ މުހައްމަދު މުއިއްޒު، ރައްޔިތުންގެ މަޖިލިސް މި ދައުރަށް އިފުތިތާހުކޮށްދެއްވައި، 2026 ވަނަ އަހަރުގެ ރިޔާސީ ބަޔާން މިއަދު ވަނީ އިއްވަވައިފަ އެވެ. ރައީސް މިއަދު ދެއްވި 3 ވަނަ ރިޔާސީ ބަޔާން 3 ގަޑިއިރަށް ދެމިގެން ދިޔަ އެވެ. ރިޔާސީ ބަޔާން ދެއްވުމަށް ބޭއްވި ޖަލްސާގައި އުއްތަމަ ފަނޑިޔާރާއި، ދައުލަތުގެ އިސް ފަރާތްތަކަކާއި، ވަޒީރުންނާއި މިނިވަން މުޢައްސަސާތަކުގެ އިސްވެރިންނާއި ބޭރުގެ ސަފީރުންނާއި ޑިޕްލޮމެޓުން ބައިވެރިވެ ވަޑައިގެންނެވި އެވެ. ހެނދުނު 09:00ގައި މަޖިލީހުގެ ޖަލްސާ ފެށުމާއެކު މިޖަލްސާގެ އެޖެންޑާގައި ހިމެނޭ ހަމައެކަނި ނަންބަރު ކަމުގައިވާ ރިޔާސީ ބަޔާން އިއްވަވަން ފެއްޓެވި އެވެ. 3 ގަޑިއިރުގެ ރިޔާސީ ބަޔާނެއް އިއްވެވިއިރު، މި ރިޔާސީ ބަޔާނުގައި ރާއްޖެއަށް ބޭނުންވާ އަދި ރައްޔިތުންނާ އެންމެ ގުޅުންހުރި ދާއިރާތަކަށް ހަގީގީ މާނާގައި އެމަނިކުފާނު ވަނީ އަލިއަޅުއްވާލައްވައި، މިހާރު ކުރެވެމުންދާ މަސައްކަތްތަކާއި އެދާއިރާތަކުން ކުރިއަށް ރާވާފައިވާ ކަންކަމުގެ ތަފްސީލް ތަފާސް ހިސާބުތައްވެސް ހިމެނޭހެން ވަނީ ހިއްސާކުރައްވާފަ އެވެ.
