މި ދެ މައްސަލަވެސް ހައިކޯޓުގައި ރަޖިސްޓްރީކޮށްފައިވާ ކަމަށް ހައިކޯޓުގެ ވެބްސައިޓުން ދައްކައެވެ. ލީވާންއާއި ޝަހްޒާންގެ ޖަލު ހުކުމުގެ މައްސަލަ ހައިކޯޓަށް ބަލައިގަތް އިރު، ޖަލު ހުކުމް ތަންފީޒުކޮށް ނިމިގެން ލީވާން މިހާރުވަނީ މިނިވަންވެފައެވެ. ޝަހުޒާން އަދި ހުރީ ޖަލުގައެވެ.
ދެ ނޫސްވެރިން ވެސް ޖަލަށް ލައިފައި މިވަނީ ގަޒުފުކުރިކަމުގެ ތުހުމަތުގައި އަދަދު ނޫހުގެ އިސްވެރިންގެ މައްޗަށް އުފުލާފައިވާ ދައުވާތަކާ ގުޅިގެން ކްރިމިނަލް ކޯޓުން ނެރުނު އަމުރަކާ ޚިލާފުވި މައްސަލައިގައެވެ.
ނޫސްވެރިން ޖަލަށްލި މައްސަލައިގައި އިންޓަނޭޝަނަލް ފެޑެރޭޝަން އޮފް ޖާނަލިސްޓްސް (އައިއެފްޖޭ) އާއި ކޮމިޓީ ޓު ޕްރޮޓެކްޓް ޖާނަލިސްޓްސް (ސީޕީޖޭ) ފަދަ ބައިނަލްއަގުވާމީ ޖަމިއްޔާތަކުން ވަނީ ކަންބޮޑުވުން ފާޅުކޮށް، ނޫސްވެރިން ވަގުތުން ދޫކޮށްލުމަށް ގޮވާލާފައެވެ.
