ދުނިޔޭގެ ލޭ ހަދިޔާކުރާ މީހުންގެ ދުވަހުގެ މުނާސަބަތުގައި އެކްސްގައި ކުރއްވި ޕޯސްޓެއްގައި ރައީސް މުއިއްޒު ވިދާޅުވީ އަމިއްލައަށް އެދިގެން ލޭ ހަދިޔާކުރާ ފަރާތްތަކުގެ ދީލަތި އަމަލުގެ ސަބަބުން ދާއިމީކޮށް ލޭ އަޅަންޖެހޭ މީހުންނާއި ކުއްލި ހާލަތުގައި ލޭއަޅަންޖެހޭ ބަލިމީހުންނަށް އެންމެ ބޭނުންވާ ވަގުތު ފުރާނަ ސަލާމަތްކުރުމަށް ވެދެވޭ ވަރަށް ބޮޑު އެހީތެރިކަމެއްކަމަށެވެ.
ބޭސްވެރިކަމާއި ޓެކްނޮލޮޖީގެ ރޮނގުން ދުނިޔެ ކިތަންމެ ބޮޑަށް ކުރިއަރާފައިވީ ނަމަވެސް، ލެޔަކީ އޭގެ ބަދަލުގައި އެހެން އެއްޗެއް ބޭނުންކުރެވޭނެ ވަސީލަތެއް ނޫންކަން ފާހަގަކުރައްވަމުން ރައިސް މުއިއްޒު ވިދާޅުވީ އާންމު ސިއްހަތު ރައްކާތެރިކުރުމަށާއި، ސިއްހީ ހިދުމަތްތައް ފުރިހަމައަށް ފޯރުކޮށްދިނުމުގެ އިތުރުން ގައުމީ ފެންވަރުގައި ކުރިމަތިވެދާނެ ކުއްލި ހާލަތްތަކަށް ތައްޔާރުވެ ތިބެންޖެހޭކަމަށެވެ. އެގޮތުން ހިލޭސާބަހަށް ލޭ ހަދިޔާކުރުމުގެ އާދަ އަށަގެންނެވުމަކީ ނުހަނު ބޭނުންތެރިކަމެއް ކަމުގައި ރައީސް މުއިއްޒު ވިދާޅުވިއެވެ.
ދިވެހިރާއްޖެ ފަދަ ރަށްތައް ވަކިވަކިން އުފެދިފައިވާ ޖަޒީރާ ގައުމެއްގައި، ލޭ ލިބޭނެ އިންތިޒާމުތަށް ހަމަޖެހިފައި ހުރުމަކީ ސިއްޙީގޮތުން ދިމާވާ ކުއްލި ހާލަތްތަކުގައި މުހިންމު ކަމެއްކަން ރައީސް މުއިއްޒު ފާހަގަކުރެއްވިއެވެ. އެގޮތުން އާންމު ހޭލުންތެރިކޮށް، އަމިއްލައަށް ލޭ ހަދިޔާ ކުރުމަށް ބާރުއެޅުމަށާއި މުޖުތަމައުގެ އެންމެންގެ ދުޅަހެޔޮ ސިއްހަތަކަށް ގުޅިގެން މަސައްކަތް ކުރުމަށް ބާރުއެޅުމަށް މި ސަރުކާރުން މަސައްކަތް ކުރައްވާނެކަމަށްވެސް ރައިސް މުއިއްޒު ވިދާޅުވިއެވެ.
ދުނިޔޭގެ ލޭ ހަދިޔާކުރާ މީހުންގެ ދުވަސް ކޮންމެ އަހަރެއްގަވެސް ފާހަގަކުރަނީ ޖޫން މަހުގެ 14 ވަނަ ދުވަހުއެވެ.
