ޝަރީފް އެގޮތަށް ވިދާޅުވީ ވީއައިއޭގެ ސަލާމަތާއި ރައްކާތެރިކަން ކަށަވަރުކުރުމަށްޓަކައި، ނޭޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އާއި، މޯލްޑިވްސް މީޓިއޮރޮލޮޖިކަލް ސާވިސް (އެމްއެމްއެސް) އަދި މޯލްޑިވްސް ރެޑް ކްރެސެންޓް (އެމްއާރްސީ) އާއެކު އެމްއޭސީއެލްގެ މެދުގައި ފަހުމުނާމާތަކެއްގައި ސޮއިކުރުމަށް މިއަދު ބޭއްވި ރަސްމިއްޔާތުގައި ދެއްކެވި ވާހަކައިގަ އެވެ.
ޝަރީފު ވިދާޅުވި ގޮތުގައި މި ފަހުމުނާމާތަކަކީ އެއާޕޯޓަށް ކުރިމަތިވެދާނެ ކުއްލި ނުރައްކަލުގެ ހާލަތަކަށް ތައްޔާރުވުމަށް އެޅުނު މުހިއްމު އަދި ހަރުދަނާ ފިޔަވަޅެއްގެ ގޮތުގައެވެ. އަދި މިފަހުމުނާމާތަކުގެ ސަބަބުން މި އިދާރާތަކުގެ މެދުގައި އޮތް ގުޅުން އިތުރަށް ބަދަހިވެ، އެކުގައި މަސައްކަތްކުރުމުގެ އޮނިގަނޑެއް އެކަށައެޅި، ޒިންމާތައް ހިއްސާކުރުމަށް މަގުފަހިވާނެ ކަމަށް ސީއީއޯ ވިދާޅުވި އެވެ.
ވީއައިއޭއަކީ އަބަދުވެސް ބަދަލުތައް އަންނަމުންދާ ތަނެއްކަން ފާހަގަކުރައްވަމުން ޝަރީފު ވިދާޅުވީ، އެއާޕޯޓުގެ މަސައްކަތްތަކަށް މެދުކެނޑުމެއް ނައިސް ކުރިއަށްގެންދެވޭނީ ކަމާ ބެހޭ ހުރިހާ އިދާރާއެއްގެ މެދުގައި އެއްބާރުލުންދެވި އެކީގައި މަސައްކަތްކުރެވިގެން ކަމަށެވެ.
އަދި ކުއްލި ހާލަތްތަކަށް ތައްޔާރުވުމަކީ އެންމެ އިދާރާއަކަށް އެކަނި ކުރެވިދާނެ ކަމެއް ނޫންކަން ފާހަގަކުރައްވައި، އެ މަސައްކަތުގައި އިދާރާތަކުގެ މެދުގައި އޮންނަ އިތުބާރާއި، ހާމަކަންބޮޑު ގޮތެއްގައި މުއާމަލާތްކުރެވުމުގެ މުހިއްމުކަން ފާހަގަކުރެއްވި އެވެ.
