މި އެއްބަސްވުންތަކުގައި ދިވެހިރާއްޖޭގެ ފަރާތުން ސޮއިކުރެއްވީ މިނިސްޓާ އޮފް ޓޫރިޒަމް އެންޑް ސިވިލް އޭވިއޭޝަން މުޙައްމަދު އަމީނެވެ. އިތިއޯޕިއާ ސަރުކާރުގެ ފަރާތުން ސޮއިކުރެއްވީ އެ ގައުމުގެ ސިވިލް އޭވިއޭޝަން އޮތޯރިޓީގެ ޑިރެކްޓާ ޖެނެރަލް ޔޮއާނަސް އަބޭރާ ބެލެޓޭ އެވެ.
އެ އެއްބަސްވުމާ އެކު އެފްރިކާ ބައްރުގެ އެންމެ ބޮޑު އެއާލައިން ކަމަށްވާ އިތިއޯޕިއަން އެއާލައިނުން ރާއްޖެއަށް އަދި ރާއްޖޭގެ ގައުމީ އެއާލައިން، މޯލްޑިވިއަނުން އިތިއޯޕިއާއަށް ސީދާ ދަތުރުތައް ކުރަން މަގުފަހިވާނެ އެވެ.
އެ ރަސްމިއްޔާތުގައި މިނިސްޓަރު އަމީން ވިދާޅުވި އެފްރިކާ ބައްރުގެ އެންމެ ބޮޑު އެއާލައިން ކަމަށްވާ "އިތިއޯޕިއަން އެއާލައިން"އިން ރާއްޖެއަށް ދަތުރުތައް ފެށުމަށާއި، ދިވެހިރާއްޖޭގެ ގައުމީ އެއާލައިން "މޯލްޑިވިއަން" އިން އިތިޔޯޕިއާއަށް ސީދާ ދަތުރުތައް ކުރުމަށް މަގުފަހިވެގެންދާ މި އެއްބަސްވުމުގެ ސަބަބުން، ރާއްޖޭގެ ފަތުރުވެރިކަމާއި ވިޔަފާރީގެ ސިނާއަތަށް އިތުރު ފުރުސަތުތަކެއް ހުޅުވިގެންދާނެ އެވެ.
މިއީ، އަމީން ވިދާޅުވި ގޮތުގައި، ރާއްޖޭގެ އިގްތިސާދީ ފުދުންތެރިކަން އިތުރުކުރަން މުޅި ދުނިޔެއާ ގުޅާލެވޭ ފަދަ ވައިގެ ދަތުރުފަތުރުގެ ވިއުގައެއް ގާއިމްކުރަން ކުރާ މަސައްކަތަށް އިތުރު ކުރެވުނު މުހިންމު ބޮޅެކެވެ.
