އެމްޓީޑީސީން ނެރުނު ބަޔާނެއްގައި މިހެން ބުނީ އެ ކުންފުނީގެ ދަށުގައި އޮންނަ ގދ. މަގުއްދުވާގެ ހެޑްލީސް ވިއްކާލަން އުޅޭ ކަމަށް ބައެއް ދިވެހި މީޑިއާތަކުން ރިޕޯޓުކޮށްފައިވާ ހަބަރުތައް ދޮގުކުރަމުންނެވެ.
އެމްޓީޑީސީން ނެރުނު އިއުލާނުގައި ބުނީ ހދ. ނާގޯށި، ގދ. މަގުއްދުވާ އަދި ބ. ކިހަވައްހުރަވަޅި، މި ތިން ރަށަކީ ދިވެހި ސަރުކާރާ އެމްޓީޑީސީއާ ދެމެދު ސޮއިކޮށްފައިވާ ލީސް އެއްބަސްވުންތަކުގެ ދަށުން ޓޫރިސްޓް ރިސޯޓު ތަރައްގީކޮށް ހިންގުމަށް އެ ކޯޕަރޭޝަނުން ކުއްޔަށް ހިފާފައިވާ ތިން ރަށް ކަމަށެވެ.
އަދި މި ތިން ރަށުގެ ހެޑްލީސްއާ ގުޅޭ އެންމެހާ ހައްގުތަކުގެ މިލްކުވެރި ފަރާތަކީ ވެސް އެމްޓީޑީސީ ކަމަށް އެ ކޯޕަރޭޝަނުން ބުންޏެވެ.
ނަމަވެސް އެ ކޯޕަރޭޝަންގެ ދަށުގައިވާ އެއްވެސް ރަށެއްގެ ހެޑްލީސް ނުވަތަ ހެޑްލީސްއާ ގުޅުން ހުރި ހައްގުގެ އެއްވެސް މިންވަރެއް ވިއްކުމަށް އަދި އެހެން ފަރާތަކަށް ދޫކޮށްލަން މި ވަގުތަށް ނިންމާފައި ނުވާ ކަމަށް އެމްޓީޑީސީން ބުންޏެވެ.
އެމްޓީޑީސީން ބުނީ، ކުރިއަށް އޮތްތަނުގައި ވެސް ގާނޫނުތަކާއި ގަވާއިދުތަކާއި ލިސްޓިން ރޫލްސްތަކާ އެއްގޮތަށް، ހާމަކުރަން ޖެހޭ ކަންކަން ހާމަކުރަމުންދާނެ ކަމަށެވެ.
