މީޑިއާނެޓްގެ އޮރިޖިނަލްއެއް ކަމަށްވާ "ޖުންޖުލާ" މިއަދު ވީޑިއޯ ކްލަބުން ޕްރިމިއާ ކުރާނެ އެވެ.
ޖުންޖުލާ" ގެ ބިރުވެރި އަދި ސަސްޕެންސްއިން ފުރިގެންވާ ތީމާ ޚިލާފަށް، މި ލަވައިން ފެނިގެންދަނީ ވާހަކައިގެ މަޑުމައިތިރި އަދި ޖަޒުބާތީ ފަރާތެވެ. މި ލަވައިގެ ވީޑިއޯ ނަގާފައިވަނީ ލ. އަތޮޅުގެ ރަށްތައް ކަމަށްވާ ފޮނަދޫ، ގަން، މާންދޫ، އަދި ގާދޫގެ އިތުރުން ފަރުކޮޅުފުށީގަ އެވެ.
ވީޑިއޯއިން މި ރަށްރަށުގެ ގުދުރަތީ ރީތިކަމާއި، ނޫވިލުތަކާއި، ހުދު ދޮންވެލިގަނޑުތަކުގެ އިތުރުން ފެހިކަންގަދަ ގަސްތައް، ލޯބީގެ ވާހަކައަށް ވަރަށް ހިތްގައިމު މަންޒަރުތަކެއްގެ ގޮތުގައި ދައްކުވައިދީފައިވެ އެވެ.
މި ލަވައަށް އަޑުއަޅާފައިވަނީ މިހާރު ކުރިއަރަމުން އަންނަ ލަވަކިޔުންތެރިޔާ ނަޞޫހު އަދި، ގިނަ ބައެއްގެ ލޯބި ލިބިފައިވާ މާއިން ރަޝީދެވެ.
ލަވައިގެ ޅެން އީސާ ޝަރީފް ހަދާފައިވާއިރު، މެލޮޑީ އަދި މިއުޒިކް ތައްޔާރުކޮށްފައިވަނީ ހުސައިން ތައުފީޤެވެ.
މުޅި ލަވައިގެ ކޯރިއޯގްރަފީ އަދި ޑައިރެކްޝަންގެ މަސައްކަތުގެ އިތުރުން އެޑިޓިންގ އާއި ކަލަރ ގްރޭޑިންގ ހަދާފައިވަނީ އަޒްހާން އިބްރާހީމެވެ. މީގެ އިތުރުން ސަމާޙް އިބްރާހީމް (ލައިޓްސްއައުޓް) ސިނެމެޓޯގްރަފީގެ މަސައްކަތް ކޮށްފައިވާއިރު، މޭކަޕް އަދި އިސްތަށިގަނޑު ސްޓައިލްކޮށްދީފައިވަނީ ޖަސްޓިން އެވެ. އަދި ހެދުން ފަރުމާކޮށްފައިވަނީ އައްމުޑިޒައިންސް އިންނެވެ.
"ޖުންޖުލާ" އަކީ އަޒްހާން އިބްރާހީމް ޑައިރެކްޓްކޮށްފައިވާ 10 އެޕިސޯޑުގެ ދިވެހި ކްރައިމް ތްރިލަރ އެކެވެ. އޭނާއަކީ ކްރިއޭޓިވް ނެޓްވޯކްގެ ފީޗަރ ފިލްމު "ލީލީ" ވެސް ޑައިރެކްޓްކުރި ފަރާތެވެ. މި ސީރީޒްގައި ކިޔައިދެނީ ސުޕްރިންޓެންޑެންޓް އޮފް ޕޮލިސް ޒާރާ ކަރީމް (ވާޝިޔާ މުޙައްމަދު) އާއި އޭނާގެ ޕާޓްނަރ ޒުހައިރު (ސާމީ) ގުޅިގެން، ހާސްކަން ބޮޑު ތަހުގީގުތަކެއްގެ ތެރެއިން މައްސަލަތަކެއް ހައްލުކުރަމުންދާ ގޮތުގެ ވާހަކަ އެވެ. މި ތަހުގީގުތަކުގެ ތެރެއިން ޒާރާގެ މާޒީގެ ސިއްރުތަކެއްވެސް މަޑުމަޑުން ހާމަވެގެންދާނެ އެވެ.
މި ސީރީޒް ޕްރިމިއަރ ކުރުމަށް ހަމަޖެހިފައިވަނީ މިއަދު، 3 އޮކްޓޫބަރުގައި ސްޓްރީމިންގ ޕްލެޓްފޯމް "ވީޑިއޯކްލަބް"ގަ އެވެ. ކޮންމެ ހަފްތާއަކު އާ އެޕިސޯޑެއް ނެރެމުންދާނެ އެވެ.
"ހުވަފެނީ ތަސްވީރު" ލަވަ މިހާރު ޔޫޓިއުބުން ބަލައިލެވޭނެ އެވެ
