މިނިސްޓްރީ އޮފް ކޮމިއުނިކޭޝަން، ސައެންސް އެންޑް ޓެކްނޮލޮޖީއިން ކޮށްފައިވާ އިއުލާނެއްގައިި ބުނީ ޤައުމީ ވޯކިން ގްރޫޕުގެ މެންބަރުކަމަށް ކުރިމަތި ލުމުގެ މުއްދަތު އިތުރު ކޮށްފައިވަނީ މިމަހުގެ 12 ވަނަ ދުވަހުގެ 14:00 ގެ ނިޔަލަށްކަމަށެވެ. މި ގުރޫޕްގެ މެންބަރު ކަމަށް ކުރިމަތި ލުމަށް އެންމެ ފުރުތަމަ ހުޅުވާލާފައި ވަނީ މިދިޔަ މަހުގެ 19 ވަނަ ދުވަހު އެވެ.
މެންބަރުކަމަށް ކުރިމަތި ލުމަށް ހުޅުވާލައިފައިވާ ދާއިރާ ތަކުގެ ތެރޭގައި ސައިންސްގެ ދާއިރާއާއި ޓެކްނޮލޮޖީގެ ދާއިރާގެ އިތުރުން އިންޖިނިއަރިންގ ދާއިރާ ހިމެނެއެވެ. އެ މިނިސްޓްރީން ބުނީ މިއިން ކޮންމެ ދާއިރާއަކަށް ނަގާނީ އާންމު ރައްޔިތުންގެ ތެރެއިން އެއް މެންބަރު ކަމަށެވެ.
މެންބަރު ކަމަށް ކުރިމަތިލެވޭނީ، ތަމްސީލުކުރާ ދާއިރާއާ ގުޅޭ ދާއިރާއަކުން ފުރަތަމަ ޑިގްރީ ނުވަތަ އެއަށްވުރެ މަތީ ފާހެއް ހާޞިލުކޮށްފައި ވާނަމައެވެ. މިނިސްޓްރީން ބުނީ ސައިންސާއި ޓެކްނޯލޮޖީ ނުވަތަ އިންޖިނިއަރިން ދާއިރާގައި މަސައްކަތްކޮށް މަދުވެގެން ތިން އަހަރު ދުވަހުގެ ތަޖުރިބާ ލިބިފައި ހުންނަން ޖެހޭނެ ކަަމަށާއި ވޭތުވެދިޔަ 2 އަހަރުގެ ތެރޭގައި ޖިނާއީ ކުށެއް ސާބިތުވެފައިވާ މީހަކު ކަމުގައި ވެގެން ނުވާނެކަމަށެވެ.
މިނިސްޓްރީން ބުނީ ދާއިރާތަކަށް ކުރިމަތިލުމަށް ޝައުގުވެރިވާ ފަރާތްތަކުން އެކަމަށް އެދި ހުށަހަޅާ ސިޓީ އާއި އައިޑީ ކާޑު ކޮޕީގެ އިތުރުން ސީ.ވީ އަދި އެޓެސްޓް ކުރެވިފައިވާ ތަޢުލީމީ ސެޓިފިކެޓްތަކުގެ ކޮޕީތައް، މިމަހުގެ 12 ވަނަ ދުވަހުގެ 14:00 ގެ ކުރިން info@mcst.gov.mv އަށް އީމެއިލް ކުރެއްވުން އެދޭކަމަށެވެ. މިނިސްޓްރީން އިތުރަށް ބުނީ މިކަމާއި ގުޅޭ އިތުރު މަޢުލޫމާތު 3302200 އަށް ގުޅާގެން ސާފްކުރެވޭނެ ކަމަށެވެ.
ޤައުމީ ވޯކިން ގްރޫޕުގެ މެންބަރުކަމަށް ކުރިމަތިލުމުގެ ފުރުސަތު ހުޅުވާލައިފައިވަނީ ހަމަ އެކަނި ދިވެހިންނަށެވެ. އަދި މެންބަރުން ހޮވުމުގައި ދާއިރާގައި އަންހެނުން ބާރުވެރިކުރުމަށް މަސައްކަތް ކޮށްފައިވާ ނުވަތަ ކުރަމުންދާ ފަރާތްތަކަށް އިސްކަންދެވޭނެކަމަށް މިނިސްޓްރީންް ބުނެއެވެ.
ޤައުމީ ވާކިން ގްރޫޕްގެ އަކީ ސައިންސާއި ޓެކްނޯލޮޖީ ދާއިރާގައި އަންހެނުން ކުރިއެރުވުމަށް މަސައްކަތްކުރާ ގުރޫޕެކެވެ.
