އުމުރުން އެންމެ 23 އަހަރު ކަރަމް ދެ ކިޑްނީ ފެއިލްވެ އޭނާގެ އުންމީދު ތައް މިއަދު ވަނީ ހަފުސް ވެފައެވެ. އެހެން ނަމަވެސް އެންމެ ފަހުވަގުތާ ހަމަޔަށް ވެސް، އުންމީދު ތަކާއެކު އޭނާ ދަތުރު ކުރަމުން އެދަނީ އުންމީދީ ރާސްތާގެ އަލި ކަމެއް ފެނޭތޯއެވެ.
ގދ. ގައްދޫ އަށް އުފަން ކަރަމް ގއ. ދާންދޫ ފާތިނާ އަލީ އާއި ލޯބިން ކުރި ކައިވެންޏާއެކު އޭނާ ދިރިއުޅެމުން ދިޔައީ ދާންދޫ ގައެވެ. އެ ރަށު ކޯޓްގެ އެޑްމިން އޮފިސަރެއްގެ މަގާމްގައި ހުރި ކަރަމް ހަޔާތް ބަދަލު ވެގެން ދިޔަ ގޮތް އޭނާ "ސީއެންއެމް' އާއި ހިއްސާ ކުރަމުން ބުނީ ދިރި އުޅުމަށް، އުޅެން އެންމެ ބޭނުންވި ދުވަހު، ކުލިބޮޑު، ބުރަބޮޑު، މާލެއަށް ރަށް ދޫކޮށް ބަދަލުވާން ޖެހުނީ މަޖުބޫރު ވެގެން ކަމަށެވެ.
ދެ އާއިލާގެ ލޯތްބާއި އޯގާތެރިކަން އެނާ އަށް ލިބެއެވެ. އެހެން ނަމަވެސް އެނާ ހަޔާތަށް އެޅިފައިވާ އަނދިރި ހިޔަނިން އަލިކަމުގެ ތެރެއަށް ދާން ހިތްވަރު ކުރާ ކަމަށާއި، އެ އުއްމީދުގައި ހުރުމަށް އޭނާ ދަނީ މަސައްކަތް ކުރަމުންނެވެ.
2020 ވަނަ އަހަރު ތެރޭގައި ކަރަމް ބުނީ ފުރަތަމަ ބޮލަށް ތަދުވެ ހޮޑުލެވޭތީ ދާންދޫ ސިއްހީ މަރުކަޒަށް ދެއްކީ ކަމަށެވެ. އާންމު ބައްޔެއްގެ އަލާމާތާ ތަފާތު ކަމެއް ޑޮކްޓަރަށް ފާހަގަ ކުރެވިގެން އެމެޖެންސީގައި މާލެ ފޮނުވީ ކަމަށެވެ. އެގޮތަށް ފުރަތަމަ އައިޖީއެމްއެޗް އަށް ދެއްކީ ކަމަށާއި، އެހާ ހިސާބުން ބަލި ދެނެ ގަނެވުނު ކަމަށެވެ. އެހެންނަމަވެސް އޭރުވަނީ ދެކިޑްނީ ފެއިލް ވެފައެވެ.
ކަރަމްގެ ބަލީގެ ހާލަތު އަންގައިދޭ ލިއުމެއް
"ފުރަތަމަ ވެސް ޑޮކްޓަރު ވިދާޅުވީ ދެ ކިޑްނީ ފެއިލް ވެފަ އޭ ހުރީ. ހަމަ ޝޮކެއް ލިބުނީ. އޭގެ ދުވަސް ކޮޅެއް ފަހުން އޭޑީކޭ އަށް ދެއްކީ. އޭޑީކޭއިން ވެސް ބުނީ ހަމަ އެހެން. އެހާ ހިސާބުން ހިތް މަޖުބޫރު ކުރުވީ ގަބޫލު ކުރަން." ކަރަމް ބުންޏެވެ.
އޭރު އަންހެނުން ބަނޑު ބޮޑު ކަމަށާއި، ބަނޑަށް ފަސް މަސް ވެފައިވާ އިރު، ލިބުނު އުފަލާ އެކު ހިތާމައިގެ ސާލެއް އުމުރަށް އެޅުނު ކަމުގެ ހިތްދަތި އިހުސާސެއް އެ ވަގުތު ކުރެވިގެން ދިޔަ ކަަމަށް އޭނާ ބުންޏެވެ. ދުނިޔެ މަތީގައި އިމްތިހާން ތަކާއި ކުރިމަތި ލާން ޖެހޭނެއެވެ. މިއީ ދިރިއުޅުމުގެ ހަގީގަތް މެއެވެ. އެކި މީހުންނަށް އެކި ވަރުގެ އިމްތިހާން ތަކާއި ކުރިމަތިލާން ޖެހޭ އިރު، މިއަދު ކަރަމް އަށް ވެސް ކުރިމަތި ވެފައި ވަނީ އެފަދަ އިމްތިހާނެކެވެ.
އޭނާ ކިޑްނީ ބަލި ތަހައްމަލް ކުރަމުންދާތާ ދެ އަހަރު ވެފައިވާ އިރު، މިހާރު ކޮންމެ ހަފްތާ އަކު ތިން ފަހަރު ޑަޔަލިސިސް ހަދަން ޖެހެއެވެ. އެއީ ރަށުން ކުރެވޭ ކަމަށް ނުވާތީ ކޮންމެ ހާލެއްގައި އުޅެން ޖެހުނަސް އުޅުނު ވަޒީފާ ދޫކޮށް މާލޭގައި މިހާރު އުޅެމުންދާ ކަމަށް އޭނާ ބުންޏެވެ.
ކަރަމް އާއި އޭނާގެ އަންހެނުން ހުޅުމާލޭ ފުލެޓެއްގައި 7000 ހާސް ރުފިޔާ އަށް ކުލި ދީގެން އުޅެމުންދާ އިރު، އޭނާ ވެސް ވަޒީފާ އަދާ ކުރަން މަޖުބޫރެވެ. ލިބޭ އެއްޗަކުން ބޭސް ފަރުވާ އަށް ހަރަދު ކޮށްފައި، މާލޭގެ ދިރި އުޅުމަކީ އެހާ ފަސޭހަ ކަމެއް ނޫނެވެ.
އަންހެނުން ވަޒީފާ އަށް ދިޔައަސް ޒަރޫރީ އެހެން ބޭނުން ފުއްދަން އެނާ އަށް މަޖުބޫރުވެ އޭނާ އާއިލީ މެމްބަރެއްގެ އޮފީހެއްގެ އެޑްމިން މަސައްކަތް ކުރާ ކަމަށް ކަރަމް ބުންޏެވެ. ހަފްތާގެ ތިން ދުވަހު ޑަޔަލިސިސް ހަދަމުންދާއިރު، ވަޒީފާ އަށް ދެވޭ ދުވަހަށް ވުރެ ގިނައީ ނުދެވޭ ދުވަސް ކަމަށާއި، އެހެން ނަމަވެސް ދިރި އުޅުމަށް އޭނާވެސް ފައިސާ ހޯދަން ޖެހޭނެ ކަމަށް އޭނާ ބުނެއެވެ. ބަލީގެ ވޭނުން ވަރުބަލި ކަމާ އެކުވެސް މެއެވެ. މިއަދު ކަރަމް އެގޮތަށްވެސް ވަނީ އުޅެން މަޖުބޫރު ވެފައެވެ.
ކަރަމް އަށް މިހާރު ވަނީ އޭނާގެ ދެ ބޭބެ އެއްގެ ކިޑްނީ ލިބިފައެވެ. މިހާރު ދަނީ ކިޑްނީ މެޗް ވޭތޯ ބަލަމުން ކަމަށާއި، އޭޑީކޭއަށް އެކަމަށް ހަތް ހާހާއި އަށް ހާހާއި ދެމެދުގެ އަަދަދަކަށް ރުފިޔާ ހަރަދު ވާނެ ކަމަށް އޭނާ ބުންޏެވެ. ކިޑްނީ މެޗް ކުރުމުގެ އޮޕަރޭޝަނަށްފަހު، ކާމިޔާބު ވެއްޖެ ނަމަ ވީހާވެސް އަވަކަކަށް އިންޑިއާއަށް ދިއުމުގެ ކަން ކަން މިހާރުވެސް ކުރަމުންދާ ކަމަށް އޭނާ ބުންޏެވެ.
އަދި އިންޑިއާއަށް ގޮސް ހުރުމަށާއި ކެއުމަށް ބޮޑު ހަރަދެއް ހޭދަ ވެގެން ދާނެ ކަމަށާއި، އެއާއިލާ އަކީ އެފަދަ ފުދުންތެރި އާއިލާއެއް ނޫން ކަމަށާއި، އެދެނީ ތި އެންމެންގެ ދީލަތި އެހީ އެއް ކަމަށެވެ.
ގުޅޭނެ ނަމްބަރު: .. 9150804 (ކަރަމް އަބްދުލް ކަރީމް)
އެކައުންޓް ނަމްބަރު: ބީއެމްއެލް ދިވެހި ( ކަރަމް އަބުދުލް ކަރީމް ) 7730000117205
ކަރަމް އެދެނީ ފައިސާގެ ގޮތުން އެހީ ދެވެން ނެތް ފަރާތްތަކުން ވެސް ކަރަމް އަށް ހެޔޮ ދުއާ ކޮށް ދިނުމަށެވެ.
ސީއެންއެމް އެހީ މި ސެގްމަންޓްގެ ދަށުން ގެނެސްދޭ ފަރާތްތަކަށް އެހީތެރިވުމަށް އެދޭ ފަރާތްތަކުން އެ އާއިލާއާ ގުޅައިގެން އެހީގެ ކަންކަން ކުރިއަށް ގެންދިއުން އެދެމެވެ.
