ގެމަނަފުށީ ކައުންސިލްގެ ރައީސް އިބްރާހިމް ނާޝިދު "ސީއެންއެމް' އަށް މައުލޫމާތު ދެއްވަމުން ވިދާޅުވީ މި ފެށޭ 1443 ވަނަ އަހަރު ރަމަޟާން މަހާ ދިމާކޮށް މުޅި އަތޮޅަށް ހާއްސަ މާހެފުމެއް އެ ރަށުގައި ބާއްވަން ނިންމާފައިވާ ކަމަށެވެ.
އެ މާހެފުން ކުރިއަށްދާނީ އޭޕްރީލް މަހުގެ އެކެއްވާ ހުކުރުދުވަހުގެ އަސުރު ނަމާދަށްފަހު އެ ރަށު ބަނދަރު ސަރަހައްދުގައި ކަމަށްވެސް ނާޝިދު ވިދާޅު ވިއެވެ. އަދި އެފަދަ ބޮޑު މާހެފުމެއް ބޭއްވުމުގެ މައިގަނޑު މަގުސަދަކީ އަތޮޅުގެ ހުރިހާ ރައްޔިތުންނާއި، އަދި ދާއިރާގެ އެންމެންނާއިއެކު އެއްމޭޒެއްގެ ދޮށުން ބައްދަލުވެ އެކުވެރިކަން ދެމެހެއްޓުމުގެ މަގުސަދުގައި ކަމަށްވެސް ނާޝިދު ވިދާޅުވިއެވެ.
މީގެ އިތުރުން ނާޝިދު ވިދާޅުވީ، މާހެފުން ބާއްވަން ވާންޖެހޭ ތައްޔާރީގެ ބޮޑު ބައެއް މިހާރު ނިމިފައި ވާކަމަށެވެ.
އެ މާހެފުމާއި ބެހޭގޮތުން އިތުރު މައުލޫމާތު ސާފްކޮށްލުމަށް މާހެފުން އިންތިޒާމް ކުރާ ޒުވާނުންގެ ގުރޫޕްގެ އެންމެ އިސްފަރާތެއް ކަމަށްވާ ކަނޑުރޯޅި ދޯނީގެ ކެޕްޓަން އަހުމަދު ޝަމްރީޒު އަށް ގުޅާލުމުން އޭނާ ބުނީ މި މާހެފުމަކީ މީގެ ދެ އަހަރެއްހާ ދުވަސް ކުރިން ފެށިގެން ޒުވާނުންގެ މެދުގައި މަޝްވަރާ ކުރެވި އިންތިޒާމް ކޮށްފައިވާ މާހެފުމެއް ކަމަށެވެ.
ގއ. ގެމަނަފުށީގައި ބާއްވާ ބޮނޑު މާހެފުމަށް ތައްޔާރުވުމަށް ޒުވާނުން އަވަދި ނެތި: ފޮޓޯ/ ގެމަނަފުށީ ކައުންސިލް
ޒުވާނުންނާއި މުއައްސަސާ ތަކާއި، ކައުންސިލުން މި މާފެހުމަށް ކަންކަން އިންތިޒާމް ކޮށްފައިވާއިރު، ރަށުގެ އެއްވެސް ރައްޔިތަކު މާހެފުމަށް ހަރަދު ކުރަން ނުޖެހޭނެ ކަމަށާއި، އެކަންތައް ކުރަން ރަށުގެ ޖަމިއްޔާ ތަކާއި، ކައުންސިލާއި، މަސްދޯނި ތަކުން ބަޖެޓް ހަމަޖައްސާފައިވާ ކަމަށް އޭނާ ބުންޏެވެ. އަދި މާހެފުމަށް ބޭނުންވާ ތަފާތު ކާނާގެ ބާވައްތައް އެ މުވައްސަސާ ތަކުން ހަމަޖައްސާނެ ކަމަށްވެސް ޝަމްރީޒް ވަނީ ބުނެފައެވެ.
ގއ. ގެމަނަފުށީގައި ބާއްވާ ބޮނޑު މާހެފުމަށް ތައްޔާރުވުމަށް ޒުވާނުން އަވަދި ނެތި: ފޮޓޯ/ ގެމަނަފުށީ ކައުންސިލް
މި މާހެފުން ކުރިއަށްދާނީ ހުކުރު ދުވަހު އަސުރު ނަމާދަށްފަހު ގެމަނަފުށީ ބަނދަރު ސަރަހައްދުގައި ކަމަށާއި، ކުރީގެ މާހެފުން ތަކުގައި ބޭނުންކުރާ ދިވެހިންގެ އިހުގެ ކެއުންތައްވެސް ހިމެނޭނެ ކަމަށް ޝަމްރީޒު ބުނެވެ. އޭގެ އިތުރުން ޒަމާނީ ބައެއް ކާ ތަކެއްޗާއެކު، ބާބެކިއުއެއްވެސް އެސަރަހައްދުން ކުރިއަށްދާނެ ކަމަށްވެސް ޝަމްރީޒު ބުނެއެވެ.
ފޯރިއާއެކު ރަށުގެ އެންމެން އެއްރޫހެއްގަ ހުކުރު ދުވަހަށް ތައްޔާރު ވަމުންދާ ކަމަށާއި، މާދަމާ އަކީ މަސައްކަތަށް އޮތް އެންމެ ފަހު ދުވަސް ކަމަށާއި، މިހާރު ދަނީ ހުރިހާ ތައްޔާރީތައް ނިންމުމުގެ މަސައްކަތް ކަމަށް ޝަމްރީޒު ބުންޏެވެ.
