ފޭދޫ ހެލްތު ސެންޓަރަށް ހުން އައިސް ހޮޑުލަވާތީ ދިޔަ އަންހެނެއްގެ ގަޔަށް ނުބައި އިންޖެކްޝަނެއް ޖެހިކަން، އައްޑޫ އިކުއިޓޯރިއަލް ހޮސްޕިޓަލް (އޭއީއެޗް) އިން ވަނީ ކަށަވަރުކޮށްދީފަ އެވެ.
އަންހެން މީހާގެ ގަޔަށް ނުބައި އިންޖެކްޝަން ޖެހި ނަރުސް މީހާ އަށް ވަގުތުން ފިޔަވަޅު އަޅާފައި ވާކަމަށްވެސް ވަނީ މައުލޫމާތު ލިބިފަ އެވެ.
ނުބައި އިންޖެކްޝަން ޖެހި ނަރުސް މީހާ ސަސްޕެންޑު ކޮށްފައި ވާއިރު، އޭއީއެޗް އިން ބުނީ، އެ ހާދިސާ މިހާރު ބަލަމުން އަންނަ ކަމަށާއި، އެ ހާދިސާގެ މައުލޫމާތު މިހާރު ނާސިން ކައުންސިލާވެސް ހިއްސާ ކޮށްފައިވާ ކަމަށެވެ. އަދި އެކަމާއި ގުޅިގެން ބަލަންޖެހޭ ކަންކަން ބަލަމުން އަންނަ ކަމަށްވެސް ވަނީ ބުނެފަ އެވެ.
ނުބައި އިންޖެކްޝަން އެއް އަންހެން މީހާގެ ގަޔަށް ޖެހުމުން އަންހެން މީހާގެ ހާލު ސީރިއަސް ކަމަށް ބުނެ ދެކެވޭ ވާހަކަތައް އޭއީއެޗުން ވަނީ ދޮގު ކޮށްފަ އެވެ.
އޭއީއެޗުން ބުނީ ނުބައި އިންޖެކްޝަނެއް ޖެހުމުން ބަލިމީހާގެ ހާލަތު ގާތުން ބަލާފަވާ ކަމަށާއި، އޭނާގެ ހާލު ރަނގަޅު ކަމަށެވެ.
